क्राइम

पेटवून घेतलेल्याचा मृत्यू
खेड : तालुक्यातील कोरेगांव-बैलवाडी येथील एकाने स्वतःच्या अंगावर पेट्रोल ओतून पेटवून घेतल्याने त्याचा मृत्यू झाल्याची घटना १८ सप्टेंबरला सायंकाळी घडली. रवींद्र बाळकृष्ण शिंदे (वय ४८) असे मृत्यू झालेल्यांचे नाव आहे. या दुर्दैवी घटनेची माहिती देणारे सुरेश शिंदे हे मयत रवींद्र शिंदे यांचे भाऊ आहेत. शिंदे यांनी मानसिक तणावामुळे घरातील मोटारसायकलकरिता आणून ठेवलेले पेट्रोल स्वतःच्या अंगावर ओतून घेऊन स्वत:ला पेटवून घेतले. यामध्ये ते गंभीर भाजल्याने त्यास उपचाराकरिता प्रथम तालुक्यातील कळंबणी उपजिल्हा रुग्णालयात दाखल करण्यात आले. त्यांना अधिक उपचाराकरिता रत्नागिरी येथील शासकीय रुग्णालयात रुग्णवाहिकेने नेत असताना त्यांचा रुग्णवाहिकेतच मृत्यू झाला. या प्रकरणी खेड पोलिस ठाण्यात आकस्मिक मृत्यू अशी नोंद करण्यात आली आहे.

जुगार खेळणाऱ्या
चौघांविरोधात गुन्हा
खेड ः शहरातील बाजारपेठेत असलेल्या मारुती मंदिराजवळील वाळंजगल्लीमध्ये पिताश्री इमारतीच्या तळमजल्यातील खोलीमध्ये पैसे लावून तीनपत्ती जुगार खेळत असताना रंगेहाथ मिळून आलेल्या चार संशयितांवर गुन्हा दाखल करण्यात आला आहे. येथील उपविभागीय पोलिस अधिकारी कार्यालयातील पोलिस हवालदार महेश महेंद्र जाधव यांनी येथील पोलिस ठाण्यात तक्रार दिल्यानुसार पोलिसांनी संशयित जितेंद्र वसंत घोडे (५५, रा. कोष्टीआळी, खेड), संतोष भिकू शिगवण (५२, रा. तिसे शिगवणवाडी, ता. खेड), सतीश शंकर इंगवले (४२, रा. शिवाजीनगर, खेड) व संतोष नारायण शिगवण (५६, शिवाजीनगर, महाडनाका, खेड) या चौघांवर गुन्हा दाखल करण्यात केला आहे. या प्रकरणी अधिक तपास खेड पोलिस करत आहेत.