‘कोमसाप’मुळे वाचन चळवळ वृद्धिंगत

95081

‘कोमसाप’मुळे वाचन चळवळ वृद्धिंगत

वृंदा कांबळी ः सावंतवाडीत काव्य वाचन स्पर्धेचे उद्‍घाटन

सकाळ वृत्तसेवा
सावंतवाडी, ता. २८ ः कोकण मराठी साहित्य परिषद शाखा सावंतवाडीतर्फे विद्यार्थ्यांसाठी तालुका मर्यादित आयोजित स्वरचित काव्य वाचन स्पर्धेचे उद्‍घाटन उत्साहात करण्यात आले. कोकणातील साहित्याचा वारसा कायम टिकवून ठेवण्यासाठी आणि मुलांमध्ये लेखन-वाचनाची आवड वाढविण्यासाठी ‘कोमसाप’ने या स्पर्धेचे केलेले आयोजन स्तुत्य आहे, असे मत ज्येष्ठ साहित्यिका वृंदा कांबळी यांनी व्यक्त केले.
स्पर्धेचे उद्‍घाटन ज्येष्ठ साहित्यिका वृंदा कांबळी, प्रा. सुभाष गोवेकर, देशभक्त शंकरराव गवाणकर कॉलेजचे प्राचार्य यशोधन गवस यांच्या हस्ते दीपप्रज्वलन करून करण्यात आला. याप्रसंगी कोमसापचे जिल्हा सदस्य भरत गावडे, सावंतवाडी तालुकाध्यक्ष दीपक पटेकर, जिल्हा सचिव ॲड. संतोष सावंत, उपाध्यक्ष अभिमन्यू लोंढे, खजिनदार डॉ. दीपक तुपकर, ॲड. नकुल पार्सेकर, प्रा. रुपेश पाटील, सहसचिव विनायक गांवस, मंगल नाईक-जोशी, किशोर वालावलकर, प्रज्ञा मातोंडकर, आत्माराम धुरी, साबाजी परब आदी उपस्थित होते. हा कार्यक्रम कोकणच्या नव्या पिढीतील साहित्यिकांना प्रोत्साहन देणारा आणि साहित्यिक वातावरणाची निर्मिती करणारा ठरेल, असा विश्वास प्रा. सुभाष गोवेकर यांनी व्यक्त केला. प्रा. गवस यांनी स्पर्धेत सहभागी विद्यार्थ्यांना शुभेच्छा दिल्या. कवी दीपक पटेकर यांनी कार्यक्रमाचे प्रास्ताविक केले. विनायक गांवस यांनी सूत्रसंचालन केले.