सिंधुदुर्गच्या मातीला नैतिकतेचा सुगंध

95103

सिंधुदुर्गच्या मातीला नैतिकतेचा सुगंध

रवींद्र खेबुडकर ः कुडाळात बॅ. नाथ पै यांना अभिवादन

सकाळ वृत्तसेवा
कुडाळ, ता. २९ ः सिंधुदुर्गातील माणसे वैचारिक परिपक्व असून, ती नैतिकता पाळणारी आहेत. त्यामुळे सिंधुदुर्गमध्ये अनैतिक गोष्टींचे प्रमाण कमी आहे. सिंधुदुर्गातील महान व्यक्ती नुसत्या नावाने नाही तर कामाने मोठ्या आहेत. सामाजिक बांधिलकीने माणुसकी जपणे, हे येथील लाल मातीचे वैशिष्ट्य आहे. त्यातील एक लक्षवेधी महान नेते म्हणजे बॅ. नाथ पै होत, असे प्रतिपादन जिल्हा परिषद मुख्य कार्यकारी अधिकारी रवींद्र खेबुडकर यांनी केले.
बॅ. नाथ पै शिक्षण संस्थेमध्ये आयोजित बॅ. नाथ पै यांच्या १०३ व्या जयंतीनिमित्त आयोजित कार्यक्रमात त्यांनी बॅ. नाथ पै यांच्या लोकाभिमुख कार्यकर्तृत्वाचा आढावा घेतला. परिचारिकांना मार्गदर्शन करताना, परिचारिका या देवाच्या जास्त जवळ असतात, कारण त्या समाजाची सेवा करतात. मानवतेची सेवा करत असतात. त्यांनी संवेदनशीलता जपत अशीच रुग्णसेवा करावी, असे आवाहन केले.
अदिती पै यांनी, विद्यार्थ्यांना नाथ पै यांच्यासारख्या महान व्यक्तींच्या कार्याचा, विचारांचा परिचय व्हावा, या उद्देशाने शिक्षण संस्थेमार्फत मिळत असलेल्या सहकार्याबद्दल समाधान व्यक्त केले. उमेश गाळवणकर यांनी आपल्या मनोगतामधून बॅ. नाथ पै यांचे कार्य आजच्या नव्या पिढीला कळावे, यासाठी जयंती-स्मृतिदिनाचे महत्त्व विशद केले.
व्यासपीठावर बॅ. नाथ पै शिक्षण संस्थेचे अध्यक्ष उमेश गाळवणकर, बॅरिस्टर नाथ पै फाउंडेशन फॉर कोकण डेव्हलपमेंटच्या अध्यक्षा अदिती पै, संस्था सीईओ अमृता गाळवणकर, नर्सिंग महाविद्यालयाच्या प्रा. कल्पना भंडारी, महिला महाविद्यालयाचे प्राचार्य अरुण मर्गज, फिजिओथेरपी प्राचार्य डॉ. प्रत्युषरंजन बिस्वाल, सेंट्रल स्कूलच्या प्राचार्या चैताली बांदेकर, बी.एड् कॉलेजचे प्राचार्य परेश धावडे, संस्था व्यवस्थापकीय अधिकारी पल्लवी कामत आदी उपस्थित होते. बॅ. नाथ पै जयंतीच्या पूर्वसंध्येला सेंटर स्कूलमार्फत आयोजित वक्तृत्व स्पर्धेतील विजेत्या स्पर्धकांना मान्यवरांच्या हस्ते गौरविण्यात आले. स्वरा कोळी, प्रिया गावडे यांनी मनोगत व्यक्त केले. प्रा. अरुण मर्गज यांनी प्रास्ताविक केले. प्रा. सुमन करंगळे-सावंत यांनी आभार मानले.