राजापुरात महागडी दुचाकी घरासमोरून लंपास

राजापुरात महागडी दुचाकी चोरीस
१५ दिवसांतील दुसरा प्रकार ः तिघे संशयित सीसीटीव्ही कॅमेऱ्‍यात कैद
राजापूर, ता. २८ ः शहराजवळील कोदवली साईनगर परिसरात घरासमोर लावलेली महागडी मोटारसायकल चोरीला गेल्याचा प्रकार उघड झाला आहे. पहाटे चारच्या दरम्यान ही चोरी झाली असून, तीन चोरटे सीसीटीव्ही कॅमेऱ्‍यात कैद झाले आहेत. गेल्या १५ दिवसांतील ही दुसरी घटना आहे. त्यामुळे वाहनचालकांमध्ये भीतीचे वातावरण आहे. चोरीप्रकरणी शमसुद्दीन अब्दुल्ला काझी (वय ६१, सध्या रा. साईनगर, कोदवली) यांनी राजापूर पोलिस ठाण्यात तक्रार दाखल केली आहे.
पोलिसांना दिलेल्या माहितीनुसार, त्यांची मोटारसायकल (एमएच ०८ बीएफ ३८८८) २६ सप्टेंबरला रात्री ८ वाजता त्यांच्या घराच्या बाजूला असलेल्या पत्र्याच्या शेडमध्ये लावली होती. २७ सप्टेंबरला पहाटे चारच्या दरम्यान ती जागेवर नसल्याचे लक्षात आले. दुचाकी चोरीला गेल्याचे लक्षात येताच फिर्यादींच्या मुलाने तत्काळ घराजवळील सीसीटीव्ही फुटेज तपासले. या फुटेजमध्ये तिघे संशयित मोटारसायकल चोरून नेत असल्याचे स्पष्टपणे दिसत आहे. या दृश्यामुळे ही चोरी चोरट्यांनी पूर्वनियोजित कट करून केल्याची शक्यता वर्तवली जात आहे. शमसुद्दीन काझी यांनी राजापूर पोलिस ठाण्यात तक्रार दाखल केली. पोलिसांनी चोरीची तक्रार दाखल करून घेत चोरट्यांविरोधात गुन्हा दाखल केला आहे. पोलिसांनी सीसीटीव्ही फुटेजमधील पुराव्याच्या आधारे पुढील तपास सुरू केला असून, या तीनही चोरट्यांचा शोध घेण्यासाठी विशेष पथके रवाना करण्यात आली आहेत.