रत्नागिरी-क्रीडा संकुलाच्या कामावरुन पालकमंत्री नाराज

क्रीडा संकुलाच्या कामावरून पालकमंत्री नाराज
बांधकाम विभागाला सुनावले; अन्यथा ठेकेदाराला काळ्या यादीत टाका
सकाळ वृत्तसेवा
रत्नागिरी, ता. १ : जिल्हा क्रीडा संकुलाचे भूमिपूजन १२ वर्षांपूर्वी झाले. एमआयडीसीने १४ एकरची जागा त्यासाठी दिली. जिल्हा क्रीडा कार्यालयाने १० कोटी ५० लाख रुपये सार्वजनिक बांधकाम विभागाला दिले. तरीही सार्वजनिक बांधकाम विभाग जिल्हा क्रीडा संकुल उभे करू शकत नाही, याबाबत पालकमंत्री उदय सामंत यांनी तीव्र शब्दांत नाराजी व्यक्त केली. ठेकेदार काम करत नसेल, तर काळ्या यादीत टाका, अशा सूचनाही दिल्या.
जिल्हा क्रीडा संकुल कार्यकारी समितीची जिल्हाधिकारी कार्यालयातील सभागृहात आज बैठक झाली.
बैठकीला जिल्हाधिकारी एम. देवेंदर सिंह, मुख्य कार्यकारी अधिकारी वैदेही रानडे, पोलिस अधीक्षक नितीन बगाटे, प्रांताधिकारी जीवन देसाई, निवासी उपजिल्हाधिकारी चंद्रकांत सूर्यवंशी, बांधकाम विभागाचे अधीक्षक अभियंता एम. एस. कुलकर्णी, अमोल ओठवणेकर, विजय शिंदे आदी उपस्थित होते.
पालकमंत्री सामंत म्हणाले, जिल्हा क्रीडा संकुलाचे काम पूर्ण करणे ही सार्वजनिक बांधकाम विभागाची जबाबदारी आहे. कोणत्याही परिस्थितीत लवकरात लवकर काम पूर्ण केले पाहिजे. बॅडमिंटन सभागृहाच्या बाबतीत जिल्हा क्रीडा कार्यालयाने फ्लोरिंगसंदर्भातील निविदा प्रक्रिया पूर्ण करावी. लांजा येथील तालुका क्रीडा संकुलच्या जागेबाबत महसूल विभागाकडे प्रस्ताव द्यावा.

चौकट
होर्डिंगसह कचरा निर्मूलन करा
रत्नागिरी पालिकेने शहराच्या स्वच्छतेवर भर द्यावा. अजूनही काही ठिकाणी शहराच्या सौंदर्यात बाधा आणणारे, वाहतुकीला अडथळा निर्माण करणारे होर्डिंग्‍ज दिसत आहेत, ते हटवावेत. त्याचबरोबर काही परिसरात कचरा दिसून येत आहे. तो निर्मूलन करावा. शहर स्वच्छ, सुंदर, नीटनेटके राहील यावर नगरपालिकेने भर द्यावा, अशी सूचना पालकमंत्री सामंत यांनी दिली.