-क्राईम

आंब्याच्या बागेत
तरुणाची आत्महत्या
रत्नागिरी ः तालुक्यातील हातखंबा येथील आंब्याच्या बागेत अनोळखी तरुणाने गळफास घेऊन आत्महत्या केली. उत्तरीय तपासणीसाठी त्याचा मृतदेह जिल्हा शासकीय रुग्णालयात दाखल कऱण्यात आला आहे. ही घटना बुधवारी (ता. १) सकाळी निदर्शनास आली. पोलिसांकडून मिळालेल्या माहितीनुसार हातखंबा येथील आंबा बागायतदार श्रीकांत जठार यांच्या आंबा बागेत अनोळखी तरुणाने गळफास घेतल्याची माहिती त्यांच्या बागेत काम करणाऱ्या राखणदाराने दिली. पोलिसांनी घटनास्थळी जाऊन पाहणी करून त्या अनोळखीचा मृतदेह उत्तरीय तपासणीसाठी जिल्हा शासकीय रुग्णालयात दाखल केला. अनोळखीने बागेतील आंब्याच्या झाडाला नायलॉनच्या दोरीने गळफास घेऊन आत्महत्या केली. त्याचे वय अंदाजे ४० ते ४५ आहे. त्यांच्या हातावर १८.८.२०२३ मिस यू डॅडी असे इंग्रजीमध्ये गोंदलेले आहे. तसेच त्यांच्या खिशात पाली ते रत्नागिरी प्रवासाचे ३० सप्टेंबरचे एसटीचे तिकीट सापडले असून तो ३० सप्टेंबरला रात्री हातखंबा येथे उतरला असून रात्रीच्या सुमारास त्याने गळफास घेऊन आत्महत्या केल्याचा अंदाज पोलिसांनी वर्तविला आहे. या प्रकरणी ग्रामीण पोलिस ठाण्यात आकस्मिक मृत्यूची नोंद करण्यात आली आहे.

घराचे कुलूप
तोडून नुकसान
रत्नागिरी ः शहरानजीकच्या शिरगाव-तिंवडेवाडी येथील घरात अतिक्रमण करून कुलुप तोडून नुकसान केल्याप्रकरणी शहर पोलिस ठाण्यात संशयितांविरुद्ध गुन्हा दाखल केला आहे. नीलेश मनोहर ठिक (रा. शिरगाव, रत्नागिरी) असे संशयिताचे नाव आहे. ही घटना २२ ते ३० सप्टेंबर या कालावधीत सकाळी साडेदहाच्या सुमारास निदर्शनास आली. पोलिसांकडून मिळालेल्या माहितीनुसार फिर्यादी तानाजी गुंडा मंडले (वय ४२, रा. परटवणे, रत्नागिरी) यांचा शिरगाव-तिवंडेवाडी येथील घराचा कायदेशीर ताबा असताना फिर्यादीच्या परवानगीशिवाय संशयित नीलेश ठिक यांनी फिर्यादींना शिवीगाळ करून घर माझे तुला काय करायचे ते कर अशी धमकी देवून घराला लावलेले कुलूप तोडून नुकसान केले. या प्रकरणी तानाजी मंडले यांनी शहर पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे.

मद्य पिणाऱ्या
तरुणाविरुद्ध गुन्हा
रत्नागिरी ः शहरातील साळवीस्टॉप येथील सार्वजनिक ठिकाणी मद्यपान करणाऱ्या तरुणाविरुद्ध शहर पोलिस ठाण्यात गुन्हा दाखल कऱण्यात आला आहे. संकेत दत्ताराम सावंत (वय २७) असे संशयित तरुणाचे नाव आहे. ही घटना २९ सप्टेंबरला रात्री साळवी स्टॉप येथील जलतरण तलावाच्या समोर निदर्शनास आली. या प्रकरणी महिला पोलिस कॉन्स्टेबल संगीता आंब्रे यांनी शहर पोलिस ठाण्यात तक्रार दिली.

साडेपाच लाखांची
आंजणारीत चोरी
लांजा ः आंजणारी-शिखरेवाडी येथे कपाटाच्या लॉकरमध्ये ठेवलेले सुमारे ५ लाख ४५ हजार रुपये किमतीचे सोन्याचे दागिने चोरट्याने चोरुन नेले. लांजा पोलिस ठाण्यात अज्ञाताविरुद्ध गुन्हा दाखल करण्यात आला आहे. लांजा पोलिसांनी दिलेल्या माहितीनुसार फिर्यादी शुभांगी यशवंत शिखरे (रा. शिखरेवाडी, आंजणारी, ता. लांजा) यांचे कपाटाच्या लॉकरमध्ये ठेवलेले दागिने १२ मे ते २० सप्टेंबर या दरम्यान चोरीस गेले असून १ ऑक्टोबरला अज्ञात चोरट्याविरुद्ध लांजा पोलिस ठाण्यात अज्ञाताविरुद्ध गुन्हा दाखल करण्यात आला आहे. यामध्ये मंगळसूत्र, हार, कानातील कर्ण फुले, कान साखळी, अंगठी यांचा समावेश आहे. या प्रकरणी शुभांगी शिखरे यांनी लांजा पोलिस ठाण्यात तक्रार दिली.