विभागीय नेमबाजी स्पर्धेत आयुषचा ‘सुवर्ण’ वेध

96853

विभागीय नेमबाजी स्पर्धेत
आयुषचा ‘सुवर्ण’ वेध

राज्यस्तरीय स्पर्धेसाठी निवड

सकाळ वृत्तसेवा
सावंतवाडी, ता. ६ ः महाराष्ट्र राज्य क्रीडा आणि युवक संचालनालयातर्फे कोल्हापूर येथे घेण्यात आलेल्या विभागीय नेमबाजी स्पर्धेत येथील पंचम खेमराज महाविद्यालयाचा राष्ट्रीय खेळाडू आयुष पाटणकर याने सुवर्णपदक पटकावले. त्याची राज्यस्तरीय स्पर्धेसाठी निवड झाली आहे.
​यापूर्वी वेंगुर्ले येथे झालेल्या जिल्हास्तरीय स्पर्धेत आयुषने प्रथम क्रमांक मिळविला होता. गतवर्षी त्याला सिंधुदुर्ग जिल्ह्यातील गुणवंत खेळाडू हा पुरस्कार मिळाला होता. कोल्हापूर येथे झालेल्या राज्यस्तरीय नेमबाजी स्पर्धेत आयुषने ४०० पैकी ३७८ गुण मिळविले.
​नवी दिल्ली येथे भारतीय खेळ प्राधिकरण येथे झालेल्या ६४ व्या राष्ट्रीय नेमबाजी स्पर्धेत महाराष्ट्र राज्याचे नेतृत्व करणाऱ्या आयुषने आपली पात्रता सिद्ध केली आहे. आयुष हा येथील श्री पंचम खेमराज महाविद्यालयाचा विद्यार्थी असून तो उपरकर शूटिंग रेंजमध्ये नेमबाजीचे प्रशिक्षण घेतो. यापूर्वी अहमदाबाद येथे झालेल्या प्री नॅशनल स्पर्धेत त्याने पात्रता सिद्ध केली होती. ​डेरवण येथे झालेल्या स्पर्धेत सुवर्णपदक तसेच वेंगुर्ले नगर परिषदेच्या स्पर्धेत सुवर्णपदक तसेच रौप्य पदके मिळविली आहेत. या यशाबद्दल त्याचे माजी केंद्रीय मंत्री सुरेश प्रभू, खासदार नारायण राणे, पालकमंत्री नीतेश राणे, माजी पालकमंत्री आमदार दीपक केसरकर, आमदार नीलेश राणे, भाजप प्रदेशाध्यक्ष रवींद्र चव्हाण आदींनी अभिनंदन केले.