सावंतवाडीत शुक्रवारी जलसंवर्धन जागृती

सावंतवाडीत शुक्रवारी
जलसंवर्धन जागृती
सावंतवाडी ः कोकण पाटबंधारे विकास महामंडळ ठाणेअंतर्गत दक्षिण कोकण पाटबंधारे प्रकल्प मंडळ, सिंधुदुर्गनगरी यांच्या विद्यमाने ‘पाणी वापर संवर्धनावर आधारित नृत्यनाटिका’ हा शेतकऱ्यांसाठी प्रबोधनात्मक कार्यक्रम सावंतवाडी येथे शुक्रवारी (ता. ९) सकाळी १० वाजता मांगिरीश सांस्कृतिक हॉल, खासकीलवाडा येथे आयोजित केला आहे. या कार्यक्रमातून शेतकऱ्यांना पाण्याचा शास्त्रशुद्ध वापर, पाण्याचे संवर्धन आणि शाश्वत शेती पद्धती याबाबत मार्गदर्शन करण्यात येणार आहे. ‘जल हेच जीवन’ हा संदेश या नृत्यनाटिकेद्वारे प्रभावीपणे दिला जाणार असून, शेतकऱ्यांना पाणी बचतीच्या शासनाच्या विविध उपाययोजनांची ओळख करून देण्यात येणार आहे. या नृत्यनाटिकेतून ठिबक सिंचन, पर्जन्यजल संधारण, शेततळी निर्मिती, पाणी वापर नियोजन आणि जलसाक्षरता याबाबत प्रत्यक्ष उदाहरणे देऊन जनजागृती केली जाणार आहे. जलसंपदा विभागाच्या या उपक्रमाचे उद्दिष्ट ‘पाणी वाचवा-भविष्य घडवा’ हे आहे. शेतकरी, युवक आणि नागरिकांनी मोठ्या संख्येने या कार्यक्रमात सहभागी होऊन पाणी संवर्धन चळवळीत सक्रिय सहभाग नोंदवावा, असे आवाहन अधीक्षक अभियंता, दक्षिण कोकण पाटबंधारे मंडळ, सिंधुदुर्ग यांनी केले आहे.