दिवाळीनिमित्त मुस्लिम महिला काढणार हिंदू महिलांना मेहंदी

मेहंदीच्या माध्यमातून सलोख्याचा सेतू
दिवाळीनिमित्त ; चिपळूणमध्ये सामाजिक ऐक्याचा उपक्रम
सकाळ वृत्तसेवा
चिपळूण, ता. १८ : दीपावलीच्या मुहूर्तावर चिपळूण शहरातील मुस्लिम महिला हिंदू महिलांना मेहंदी लावणार आहेत. रविवारी (ता. १९) सकाळी अकरा ते दुपारी तीन वाजेपर्यंत इंदिरा गांधी सांस्कृतिक केंद्र चिपळूण येथे हा कार्यक्रम आयोजित करण्यात आला आहे.
कोकण सिरत कमिटी चिपळूण व चिपळूण मुस्लिम वूमन अँड चाईल्ड वेलफेअर यांच्या संयुक्त विद्यमाने राष्ट्रीय एकात्मता व सामाजिक एकता वाढावी, या उद्देशाने या कार्यक्रमाचे आयोजन करण्यात आले आहे.
याबाबत माहिती देताना माजी नगराध्यक्ष रिहाना बिजले म्हणाल्या, भारत देशाचे वैशिष्ट्य म्हणजे विविधतेतून एकता व एकतेमध्ये विविधता, असे आहे. चिपळूणमधील सामाजिक एकता ही चांगल्या पद्धतीने टिकून आहे. ती अधिक वाढावी यासाठी कोकण सिरत कमिटी व चिपळूण मुस्लिम वूमन अँड चाईल्ड वेलफेअर यांच्या संयुक्त विद्यमाने आपल्या भगिनींना दिवाळीच्या शुभ मुहूर्तावर मेहंदी लावली जाणार आहे. ज्या भगिनी आपल्या हाताला मेहंदी लावू इच्छितात त्यांनी कार्यक्रमात सुसूत्रता यावी याकरिता आपली नावे नसरीन खडस यांच्याकडे संपर्क करावा, असे आवाहन करण्यात आले आहे.