पाली शाळेत दुर्गोत्सव उपक्रम

पाली शाळेत दुर्गोत्सव उपक्रम
सकाळ वृत्तसेवा
पाली ता. २० ः महाराष्ट्र शासनाने दिपावलीत दुर्गोत्सव आयोजित करुन गडकिल्ल्यांची प्रतिकृती साकारण्याचे आवाहन केले आहे. त्याला प्रतिसाद देवून तालुक्यातील पाली येथील जिल्हा परिषद आदर्श विद्यामंदिर शाळा पाली क्र.१ मधील विद्यार्थ्यांनी शिवकालीन किल्ल्याची प्रतिकृती साकारली.
नवीन राष्ट्रीय शैक्षणिक धोरणानुसार शिक्षणाचा उद्देश केवळ बौद्धिक विकास नसून त्याचबरोबर चारित्र्य निर्माण आणि २१ शतकातील मुख्य कौशल्ययुक्त संपूर्ण व सर्वांगीण विकसित व्यक्ती निर्मिती असेल. शाळांमधील विद्यार्थी ‘एक भारत श्रेष्ठ भारत’ या उपक्रमात सहभागी व्हावेत, विद्यार्थ्यांच्या कल्पना आणि सर्जनशीलता यांना उमलण्याची संधी मिळावी या उद्देशाने विद्यार्थ्यांसाठी हा दुर्गोत्सव आयोजित केला होता. यावेळी कलाकार्यानुभव अंतर्गत आकाश कंदील, पणत्या रंगविणे, भेट कार्ड बनवण्याची कार्यशाळाही घेण्यात आली. मुख्याध्यापक जनार्दन मोहिते यांच्या संकल्पनेतून पदवीधर उपशिक्षक ममता सावंत, मारुती घोरपडे, श्रद्धा रसाळ, श्रुती वारंग, प्रमिला मावळणकर यांच्या सहकार्याने विद्यार्थ्यांनी उपक्रम केले. शाळा व्यवस्थापन समितीचे अध्यक्ष उमेश शिंदे यांनी किल्ल्याची प्रतिकृती बनवण्यासाठी सहकार्य केले.