दिव्यांगांसाठी देवगड प्रशासनाचा मायेचा हात

01100

दिव्यांगांसाठी देवगड प्रशासनाचा मायेचा हात

रुग्णालयात नोंदणी शिबिर; आरोग्य, महसूल विभागाचा पुढाकार

सकाळ वृत्तसेवा
देवगड, ता. २९ ः येथील ग्रामीण रुग्णालयात घेण्यात आलेल्या दिव्यांग नोंदणी शिबिरास प्रतिसाद लाभला. आरोग्य व महसूल विभागाच्या कर्मचाऱ्यांनी यासाठी मेहनत घेतली. शिबिराला प्रतिसाद मिळाल्याबद्दल तहसीलदार रमेश पवार यांनी समाधान व्यक्त केले.
तालुक्यात एकूण ९५८ दिव्यांग लाभार्थी सामाजिक न्याय व विशेष सहाय्य विभाग यांच्याकडून संजय गांधी निराधार अनुदान योजना व श्रावणबाळसेवा राज्य निवृत्ती वेतन योजनेचा लाभ घेत आहेत. पैकी ५७९ कार्ड असलेले लाभार्थी तर ३७९ कार्ड नसलेले लाभार्थी आहेत. दिव्यांग कल्याण विभागाकडील शासन परिपत्रकान्वये केंद्र शासनाच्या धर्तीवर दिव्यांगत्व संदर्भातील सर्व लाभ मिळविण्यासाठी वैश्विक ओळखपत्र बंधनकारक केले आहे. तसेच सर्व दिव्यांग लाभार्थ्यांची पडताळणी करून त्यांची पात्र तसेच अपात्रता तपासणीच्या शासनाच्या सुचना आहेत. त्यानुसार आज येथील ग्रामीण रुग्णालयात दिव्यांग नोंदणी शिबिर घेण्यात आले. या शिबिरास दिव्यांग लाभार्थ्यांनी प्रतिसाद दिला.
यावेळी जिल्हा रुग्णालय ओरोस येथील डॉ. बाळासाहेब जोशी, डॉ. निखिल अवधुत, डॉ. सचिन डोंगरे, डॉ. शाम राणे, डॉ. मेघनाथ लेले, योगिता शिंदे, रेश्मा भाईप, श्रीधर पोवार, प्रवीण पाटील, शिवानी चिवटे, दिव्या आठवले, विजय पवार, सोनम राणे, विजय जाधव उपस्थित होते. शिबिर यशस्वी होण्यासाठी ग्रामीण रुग्णालयाचे वैद्यकीय अधीक्षक डॉ. प्रकाश पाटोदेकर, वैद्यकीय अधिकारी डॉ. संजय विटकर, डॉ. निनाद धुरी, डॉ. अमित कदम, डॉ. रुपाली पोकळे, अधिपरिचारिका निशा जाधव, माणिक महाडिक, समीक्षा सावंत, ज्योत्स्ना धुरी, अधिपरिचारक अविनाश कर्नाळू, शिल्पा कुंभार, स्वप्नील मोरे, श्रीपाद मोरये, अमर शिर्के तसेच संजय गांधी नायब तहसीलदार संतोष खरात आणि महसूल कर्मचाऱ्यांनी मेहनत घेतली.