लोकल बसच्या जागी शिवशाहीने प्रवाशांवर भुर्दंड

लोकलऐवजी शिवशाही बस
प्रवाशांवर भुर्दंड; ३१ ऐवजी ४६ रुपये तिकीट
सकाळ वृत्तसेवा
चिपळूण, ता. ३१ ः चिपळूण ते खेड या मार्गावर दर अर्ध्या तासाने साधी (लोकल) एसटी बस सोडली जाते. या मार्गावर दररोज कामासाठी, शिक्षणासाठी तसेच इतर कामकाजासाठी अनेक प्रवासी प्रवास करतात. हे प्रवासी नियोजित वेळेत बसस्थानकावर पोहोचतात. मात्र, नियोजित लोकल बसच्यावेळी अचानक वातानुकूलित शिवशाही बस लोकलच्या नावाने सोडली जाते. यामुळे भुर्दंड वाढत असल्याने नियमित प्रवास करणारे लोटे येथील शंतनू रेडीज यांच्यासह काही प्रवाशांनी एसटी महामंडळाकडे तक्रारी केल्या आहेत.
या प्रकारामुळे प्रवाशांना लोकलच्या भाड्याऐवजी शिवशाहीचे दुप्पट भाडे आकारले जाते. त्यामुळे प्रवाशांवर अनावश्यक आर्थिक ताण येतो. लोटे ते चिपळूण ३१ रुपये तिकीट आहे. तिथे ४६ रुपये तिकीट द्यावे लागते. परिणामी, प्रवासी आणि वाहकांमध्ये वादावादीचे प्रकार घडतात. या मार्गावर प्रवाशांकडून शिवशाही बसची मागणी नसतानाही ती सोडली जाते. अनेकदा सामान्य विद्यार्थ्यांकडे मासिक पास असल्याने वाढीव तिकिटासाठी पैसे नसतात. प्रशासनाने या प्रकाराकडे तातडीने लक्ष देऊन प्रवाशांना दिलासा द्यावा अन्यथा या विरोधात आंदोलन छेडावे लागेल, असा इशाराही लोटे येथील शंतनू रेडीज यांनी दिला आहे.
-------
कोट
पंढरपूर यात्रेसाठी चिपळूण आगारातून जादा गाड्या सोडण्यात आल्या आहेत. परिणामी, स्थानिक मार्गावर गाड्यांचे प्रमाण काहींसे कमी आहे. त्यामुळे प्रवाशांच्या सोयीसाठी म्हणून काही दिवस चिपळूण ते खेड मार्गावर शिवशाही बस सोडण्यात आल्या. पंढरपूरला गेलेल्या बसेस परत आल्यानंतर एक-दोन दिवसात पुन्हा नियमित लोकल बसेस याच मार्गावर धावणार आहेत.
- दीपक चव्हाण, आगार व्यवस्थापक, चिपळूण