तालुक्यात ९ अंगणवाड्यांमधील पदे रिक्त

खेडमधील नऊ अंगणवाड्यांत पदे रिक्त
सकाळ वृत्तसेवा
खेड, ता. ३ : तालुक्यातील एकात्मिक बालविकास सेवा योजना प्रकल्पांतर्गत ९ गावांतील अंगणवाड्यांमध्ये सेविका आणि मदतनीस पदे रिक्त असल्याचे समोर आले आहे. या जागांमुळे गावातील लहान बालकांसह महिलांना मूलभूत आरोग्य, पोषण आणि शिक्षणविषयक मार्गदर्शनापासून वंचित राहावे लागत आहे.
खेड तालुक्यातील चाटव, निळवणे, शिरगांव-विलासनगर येथील अंगणवाड्यांमध्ये अंगणवाडी सेविका पदे तर म्हाळुंगे, वाडीबीड, मुरडे-मोहल्ला, नांदगाव-मोहल्ला, संगलट-बौद्धवाडी आणि तिसंगी-नवानगर येथील अंगणवाड्यांमध्ये मदतनीस पदे रिक्त आहेत. या रिक्त पदांमुळे ३ ते ६ वयोगटातील मुलांचे प्राथमिक शिक्षण आणि पोषण योजनांचे मार्गदर्शन प्रभावीपणे होत नाही. ग्रामस्थांनी या रिक्त जागा तातडीने भराव्यात, अशी मागणी केली आहे. या संदर्भात प्रकल्प अधिकारी दीपाली शिरीषकर यांनी सांगितले की, अंगणवाड्यांमधील रिक्त जागा लवकरच भरल्या जाणार असून, पुढील महिन्यात पात्र महिला उमेदवारांकडून अर्ज मागवले जाणार आहेत. इच्छुकांनी संबंधित ग्रामपंचायत किंवा प्रकल्प कार्यालयाशी संपर्क साधावा. रिक्त पदांची भरती झाल्यास गावातील बालकांना शिक्षण, आरोग्य आणि पोषण योजनांचा लाभ पुन्हा सुरळीतपणे मिळणार आहे.