विठोबाच्या जत्रोत्सवात बांद्यात भाविकांची गर्दी

02206

विठोबाच्या जत्रोत्सवात
बांद्यात भाविकांची गर्दी

सकाळ वृत्तसेवा
बांदा, ता. ३ : येथील प्रसिद्ध श्री विठ्ठल मंदिराचा वार्षिक जत्रोत्सव कार्तिकी एकादशीला मोठ्या उत्साहात व भक्तीमय वातावरणात साजरा झाला. यानिमित्त रविवारी (ता. २) मंदिरात पहाटेपासून विविध धार्मिक कार्यक्रमांचे आयोजन करण्यात आले होते.
पहाटे पाचला काकड आरतीने या सोहळ्याला आरंभ झाला. त्यानंतर दर्शनास सुरुवात झाली. सकाळपासूनच श्री विठुरायाच्या दर्शनासाठी भाविकांची मोठी गर्दी होती. सकाळी इन्सुली येथील वारकरी दिंडी शेकडो वारकरी भाविकांच्या उपस्थितीत विठूनामाच्या गजरात मंदिरात आली. त्यांचे देवस्थानतर्फे स्वागत करण्यात आले. सायंकाळी वाजतगाजत उत्सवमूर्तीचे मंदिरात आगमन झाले. त्यानंतर श्री विठ्ठल सोहिरा महिला भजन मंडळाची भजनसेवा झाली. सातला नित्य सायंआरती झाली. त्यानंतर रात्री श्रींचा पालखी सोहळा तसेच आजगांवकर दशावतार मंडळाच्या नाट्यप्रयोगाचे आयोजन करण्यात आले होते. उत्सवानिमित्त मंदिरात आकर्षक फुलांची सजावट व रोषणाई केली होती. भाविकांनी मोठ्या संख्येने या सोहळ्याला उपस्थित राहून दर्शनाचा लाभ घेतला.