‘ओंकार’ला इजा होऊ नये म्हणूनच फटाके फोडले

‘ओंकार’ला इजा होऊ नये
म्हणूनच फटाके फोडले

सावंतवाडी वनविभागाचे स्पष्टीकरण

सकाळ वृत्तसेवा
बांदा, ता. ८ ः तेरेखोल नदीतील पाण्याचा पंप ओढण्याचा प्रकार ओंकार हत्तीकडून सुरू होता. यावेळी विजेचा धक्का लागून त्याला कोणतीही इजा होऊ नये, यासाठी वन कर्मचाऱ्यांनी त्याच्या आजूबाजूला फटाके फोडले. मात्र, यात त्याला कोणतीही हानी झाली नाही, असा खुलासा सावंतवाडी वनविभागाने केला आहे.
दरम्यान, दांड्याने मारहाण करणारी संबंधित व्यक्ती त्यावेळी ड्यूटी बजावणारा पोलिस कर्मचारी असल्याचे चौकशीत निष्पन्न झाले आहे. त्यामुळे त्याची चौकशी करावी, असे पत्र बांदा पोलिस ठाण्यात दिले आहे. मात्र, अद्याप पोलिसांकडून कोणतीही कार्यवाही झाल्याबाबत आपल्याला कळविलेले नाही, अशी माहिती सावंतवाडी वनविभागाचे वनक्षेत्रपाल सुहास पाटील यांनी दिली.
शुक्रवारी (ता. ७) रात्री उशिरा बांदा तुळसाण पुलाच्या परिसरात तेरेखोल नदीपात्रात उतरलेल्या ओंकार हत्तीवर ॲटम बॉम्ब टाकण्यात आल्याचा प्रकार बांद्यातील स्थानिक नागरिक व कार्यकर्ते सुशांत पांगम व श्यामसुंदर धुरी यांनी उघड केला होता. याबाबत सावंतवाडी वनविभागाकडून खुलासा केला आहे.