भातपीक सुकवण्यासाठी महामार्गाचा उपयोग

03571

भातपीक सुकवण्यासाठी महामार्गाचा उपयोग
अपूर्ण कामामुळे वाहतूक तुरळक ; शेतकऱ्यांना दिलासा
सकाळ वृत्तसेवा
साखरपा, ता ११ : बांधून पूर्ण झालेले; पण वाहतुकीसाठी खुले न झालेले महामार्गावरील टप्पे सध्या शेतकऱ्‍यांचे मित्र बनत चालल्याचे समोर येत आहे. अशा ठिकाणी कापणी केलेले भातपिक शेतकऱ्‍यांनी सुकवण्यासाठी पसरलेले चित्र जागोजागी पाहावयास मिळत आहे.
रत्नागिरी-नागपूर हा राष्ट्रीय महामार्ग आंबाघाटाच्या पायथ्यापर्यंत काही अपवाद वगळता एका बाजूने बांधून पूर्ण झाला आहे. काही ठिकाणच्या मोऱ्‍या, नदीवरील पऱ्‍यांवरील छोटे पूल बांधण्याचे काम अपूर्ण आहे. त्यामुळे अशा ठिकाणच्या आसपासचे महामार्गाचे काही भाग बांधून पूर्ण झाले असले तरी वाहतुकीस खुले केलेले नाहीत. महामार्गावरील हीच ठिकाणे सध्या शेतकऱ्‍यांच्या सोयीची ठरत आहेत. महामार्गाच्या आसपास शेती करणारे शेतकरी कापून झालेले भातपिक महामार्गावर आणून सुकवत आहेत. या मार्गांवर वाहतूक नसल्यामुळे शेतकऱ्‍यांची मोठी सोय होताना दिसत आहे. सिमेंटचे रस्ते दुपारच्या उन्हात तापत असल्यामुळे पसरलेले भातपिक चांगले सुकते. त्यामुळे पाली ते साखरपादरम्यान ठिकठिकाणी कापलेले भातपिक शेतकऱ्‍यांनी रस्त्यावर पसरल्याचे पाहावयास मिळत आहेत.
---
सिमेंटच्या रस्त्याचा उपयोग
महामार्गावरील अनेक ठिकाणे कामे अपूर्ण असल्याने येथे वाहतूक सुरू करण्यात आलेली नाही. मोजकीच तुरळक वाहतूक या मार्गावर असते. त्यात सिमेंटचे रस्ते असल्याने ते चांगलेच तापतात त्याचा उपयोग कापणी केलेले भातपीक सुकवण्यास शेतकऱ्यांना चांगला उपयोग होऊ लागला आहे. त्यामुळे शेतकऱ्यांची कामे जलदगतीने होताना दिसत आहेत.