सावंतवाडीत रविवारी महाआरोग्य शिबिर

03965

सावंतवाडीत रविवारी महाआरोग्य शिबिर

डॉ. ऋत्विक पाटणकर ः राणी पार्वतीदेवी प्रशालेत मोफत सेवा

सकाळ वृत्तसेवा
सावंतवाडी, ता. १२ ः पाटणकर एज्युकेशन ट्रस्ट आणि आरजी स्टोन हॉस्पिटल यांच्या माध्यमातून सावंतवाडीत रविवारी (ता. १६) आरपीडी हायस्कूल येथे मोफत महाआरोग्य शिबिर आयोजित केले आहे. मोफत सल्ला व तपासणी या शिबिरात होणार असल्याची माहिती डॉ. ऋत्विक पाटणकर यांनी दिली. येथे आज आयोजित पत्रकार परिषदेत ते बोलत होते.
डॉ. पाटणकर म्हणाले, ‘रविवारी (ता. १६) सकाळी १० ते ४ या वेळेत राणी पार्वतीदेवी हायस्कूलच्या सभागृहात आयोजित या आरोग्य शिबिरात मुतखडा, प्रोस्टेट ग्रंथी, पित्तशय खडे, हर्निया, मूळव्याध, ओव्हरीयन सिस्ट, आहार, गर्भाशयाच्या गाठी आदींचा मोफत सल्ला तसेच डोळे तपासणी, हिमोग्लोबीन, रक्तशर्करा, युरोफ्लोमेट्री आदी मोफत तपासण्या होणार आहेत. तपासणीनंतर आवश्यक असलेल्या पुढील उपचारांसाठीही योग्य सल्ला या शिबिरामध्ये देण्यात येणार आहे.’
डॉ. पाटणकर यांनी औरंगाबाद येथे वैद्यकीय शिक्षण पूर्ण केल्यानंतर गोवा मेडिकल कॉलेज व आता आरजी स्टोन हॉस्पिटल येथे वैद्यकीय सेवा देत आहेत. ते पुढे म्हणाले, ‘माझ्या वैद्यकीय सेवेचा जन्मभूमीतील लोकांना फायदा व्हावा, यासाठी आम्ही आरोग्य शिबिरासारखा हा उपक्रम राबवत आहोत. यानंतर दर रविवारी सावंतवाडीत ‘आरजी स्टोन टू’च्या माध्यमातून ओपीडीही सुरू करणार आहे. सकाळी ११ ते १ या दोन तासांसाठी रुग्ण तपासणी केली जाईल. सद्यस्थितीत स्टोनसारखे आजार मोठ्या प्रमाणात मानवी शरीरामध्ये उद्भवत आहेत. वातावरणातील बदल तसेच आहार पद्धती आणि शारीरिक हालचाली या सर्व गोष्टी याला कारणीभूत आहेत. स्टोनचा परिणाम शरीरातील अन्य घटकांनाही जाणवू शकतो. त्यामुळे प्रत्येकाने स्टोनच्या बाबतीत मोठ्या प्रमाणात काळजी घेणे गरजेचे आहे. त्याकडे जाणीवपूर्वक लक्ष असणे आणि डॉक्टरांच्या सल्ल्यानुसार उपचार पद्धती सुरू करणे गरजेचे आहे.’ यावेळी डॉ. भावेश पटेल, ॲड. रुजूल पाटणकर उपस्थित होते.