-जमिनीच्या वादातून सख्ख्या भावांमध्ये हाणामारी

चुलत भावांमध्ये हाणामारी
लांजातील प्रकार ; परस्परविरोधी तक्रारी
सकाळ वृत्तसेवा
लांजा, ता. १३ ः शहरातील वैभव वसाहत येथे दोन सख्ख्या चुलत भावांमध्ये जमीनजागेच्या वादातून शिवीगाळ, हाणामारीची घटना बुधवारी (ता. १२) रात्री घडली. या प्रकरणी परस्परविरोधी तक्रारी दाखल करण्यात आल्या असून, पोलिसांनी एकूण तिघांवर गुन्हा दाखल केला आहे.
या घटनेत ज्ञानदा पृथ्वीराज मोरे (वय २९) यांनी लांजा पोलिस ठाण्यात केलेल्या तक्रारीनुसार, त्यांचे पती आणि चुलत दीर यांच्यामध्ये वडिलोपार्जित जमिनीच्या कारणावरून वाद सुरू आहे. १२ नोव्हेंबरला ज्ञानदा मोरे मुलासह घरी होत्या. या वेळी सख्खे चुलत दीर राजीव मोरे आणि सासरे अनिल मोरे यांनी तिच्या घरी जाऊन तुझा नवरा दुपारी आमच्याशी जनावरांच्या गोठ्यावरून भांडत होता, असे बोलून दीर राजीव मोरे याने तिला शिवीगाळ केली. त्यानंतर ढकलून दिले व‌ हातावर मारहाण केली. त्यांचे पती पृथ्वीराज मोरे हे पत्नीला सोडवण्यासाठी तो गेला असता अनिल मोरे यांनी त्याला लाकडी फळीने दोन्ही पायावर मारहाण केली. त्यांनी केलेल्या फिर्यादीनुसार, पोलिसांनी राजीव अनिल मोरे आणि अनिल लहू मोरे या दोघांविरोधात गुन्हा दाखल केला आहे.
राजीव अनिल मोरे यांनी केलेल्या तक्रारीनुसार, पृथ्वीराज मोरे यांच्या वडिलांविरोधात न्यायालयात दावा दाखल केला आहे. त्याची नोटीस पृथ्वीराज यांच्या वडिलांना प्राप्त झाली आहे. त्याचा पृथ्वीराज याला राग आला. त्याने १२ नोव्हेंबरला दुपारी राजीव मोरे यांच्या आई-वडिलांना शिवीगाळ करून हाताने थोपटाने मारहाण केली. पोलिसांनी पृथ्वीराज प्रदीप मोरे यांच्या विरोधात गुन्हा दाखल केला आहे. हेडकॉन्स्टेबल राजेंद्र कांबळे हे तपास करत आहेत.