डिजिटल डिस्प्ले व्हिडिओ वॉल

कोंकण रेल्वेच्या मडगाव स्थानकात
डिजिटल डिस्प्ले व्हिडिओ वॉल
रत्नागिरी, ता. १४ः प्रवाशांसाठी आधुनिक, तंत्रज्ञान-सक्षम सुविधा उपलब्ध करून देण्याच्या दिशेने कोकण रेल्वेने महत्त्वपूर्ण पाऊल उचलले आहे. कोकण रेल्वेचे अध्यक्ष व व्यवस्थापकीय संचालक संतोष कुमार झा आणि मनीषा झा यांच्या हस्ते मडगाव रेल्वे स्थानकात अत्याधुनिक डिजिटल डिस्प्ले व्हिडिओ वॉलचे उद्घाटन करण्यात आले.
मडगाव रेल्वेस्थानकावर उभारलेल्या ही वॉल सुमारे २०० चौरस फूटाची आहे. याद्वारे प्रवाशांना रिअल-टाइम ट्रेन वेळापत्रक, प्लॅटफॉर्मची माहिती, प्रवासी सूचना, सुरक्षा संदेश, तसेच स्थानिक पर्यटनस्थळांची माहिती तत्काळ उपलब्ध होणार आहे. ही सुविधा ग्राफॉन इनोव्हेटिव्ह डिजिटल सोल्युशन्स, पालक्काड यांच्या सहकार्याने पाच वर्षांच्या कालावधीसाठी उभारली आहे. प्रवाशांना तात्काळ व अचूक माहिती मिळावी, स्थानकातील प्रवासी हालचाल अधिक सुकर व्हावी आणि एकूणच प्रवासाचा अनुभव अधिक सोयीस्कर व्हावा, यासाठी ही प्रणाली उपयुक्त ठरणार आहे. कोंकण रेल्वेच्या स्थानकांचे आधुनिकीकरण करण्याच्या सततच्या प्रयत्नांचा हा एक भाग आहे, असे कोरेतर्फे सांगण्यात आले.