कृष्णभावनामृत संघामार्फत भगवद्गीता प्रज्ञाशोध परीक्षा

कृष्णभावनामृत संघामार्फत
भगवद्गीता प्रज्ञाशोध परीक्षा

सकाळ वृत्तसेवा
सावंतवाडी, ता. १५ ः भगवद्गीता ही भारतीय संस्कृती आहे. ती शालेय व विद्यालयीन विद्यार्थ्यांपर्यंत पोहोचवावी, या हेतूने आंतरराष्ट्रीय कृष्णभावनामृत संघ इस्कॉन सावंतवाडी यांच्यातर्फे भगवद्गीता प्रज्ञाशोध परीक्षेचे आयोजन केले आहे. या परीक्षेसाठी नाव नोंदणीची तारीख २२ डिसेंबरपर्यंत असेल.
सहभागी विद्यार्थ्यांना भगवद्गीता जशी आहे तशी तसेच प्रश्नपत्रिका व उत्तरपत्रिका देण्यात येणार आहे. स्वयंशिस्त पाळणे, विश्व बंधुत्वाची भावना प्रेरित करणे, भगवद्गीतेला जीवनात आत्मसात करण्यासाठी प्रेरित करणे यांसह अन्य गुण विकसित करण्यासाठी जिल्ह्यातील प्रत्येक शाळा व महाविद्यालयांमध्ये प्रज्ञाशोध परीक्षेचे आयोजन केले आहे. या स्पर्धेत पहिल्या तीन विद्यार्थ्यांना बक्षिसे अनुक्रमे ५०००, २००० व १००० रुपये देण्यात येणार आहेत. ही बक्षिसे पाचवी ते सातवी व आठवी ते दहावी या दोन गटांसाठी देण्यात येणार आहेत. प्रत्येक विद्यालयातून तीन विशेष उत्तेजनार्थ बक्षिसे आहेत. यासाठी शाळेतील व महाविद्यालयातील विद्यार्थ्यांनी नाव नोंदणी करणे आवश्यक आहे. सर्व विद्यार्थ्यांना आंतरराष्ट्रीय दर्जाचे प्रमाणपत्रे देण्यात येणार आहे. ही परीक्षा सर्व विद्यार्थ्यांनी आपल्या घरी बसून भगवद्गीतेमध्ये पाहून लिहावयाची आहे, असे आयोजकांनी कळविले आहे.