बांद्यात १३ डिसेंबरला वक्तृत्व स्पर्धा

बांद्यात १३ डिसेंबरला वक्तृत्व स्पर्धा

सकाळ वृत्तसेवा
बांदा, ता. १९ ः मुलांना आपल्या मनातील विचार इतरांना पटवून देण्याचे कौशल्य निर्माण व्हावे तसेच त्यांच्यामध्ये नेतृत्व गुण विकसित व्हावेत, या उद्देशाने (कै.) शशिकांत शांताराम नाडकर्णी (बांदा) यांच्या कायम ठेव देणगीतून त्यांचे वडील (कै.) शांताराम कमळाजी नाडकर्णी व आई (कै.) शांताबाई शांताराम नाडकर्णी यांच्या स्मरणार्थ येथील नट वाचनालयात १३ डिसेंबरला सकाळी दहाला नाडकर्णी वक्तृत्व स्पर्धेचे आयोजन केले आहे.
या स्पर्धेचे हे २१ वे वर्ष आहे. सावंतवाडी व दोडामार्ग तालुक्यांतील पाचवी ते सातवी या प्राथमिक गटातून दोन स्पर्धक व आठवी ते दहावी या माध्यमिक गटातून दोन स्पर्धक सहभागी होऊ शकतात. प्राथमिक गटासाठी ‘वाचनाचे महत्त्व’ व ‘माझा आवडता संशोधक’ हे विषय ठेवण्यात आले असून वेळ ४ मिनिटे आहे. माध्यमिक गटासाठी ‘माझा आवडता कवी’ व ‘व्यायामाचे महत्त्व’ हे विषय ठेवण्यात आले असून वेळ ५ मिनिटे आहे. स्पर्धकाने कोणत्याही एका विषयावर वक्तृत्व सादर करावयाचे आहे. विजेत्यांना रोख पारितोषिक व प्रमाणपत्र देण्यात येणार आहे. स्पर्धक शाळांनी आपले अर्ज १० डिसेंबरपूर्वी ग्रंथपाल, नट वाचनालय, बांदा यांच्याकडे पाठवावेत. स्पर्धेत आपल्या शाळेचे स्पर्धक पाठवून स्पर्धा यशस्वी करावी, असे आवाहन नट वाचनालयाने केले आहे.