आम्ही आणि शिक्षण यावर व्याख्यान

आम्ही आणि शिक्षण
यावर व्याख्यान
रत्नागिरीः जिल्हा ग्रंथालय संघाच्या सुवर्ण महोत्सवी वर्षाअंतर्गत रत्नागिरी जिल्हा ग्रंथालय संघ रत्नागिरी व डी. जे. सामंत वरिष्ठ महाविद्यालय पाली यांच्यावतीने ‘आम्ही आणि शिक्षण’ या विषयावर गोवा येथील नामवंत साहित्यिक निवृत्त प्रा. कृष्णाजी कुलकर्णी यांचे व्याख्यान झाले. प्रा. कुलकर्णी यांनी व्याख्यानात शिक्षण हा प्रत्येक व्यक्तीच्या जीवनाचा मूलमंत्र आहे, विद्यार्थी हा परीक्षार्थी न राहता ज्ञानार्थी झाला पाहिजे, विद्यार्थ्यांनी गुण मिळवण्याच्या मागे न लागता ज्ञानप्राप्तीसाठी शिक्षण घेतले पाहिजे, हे विविध उदाहरणांच्या माध्यमातून स्पष्ट केले. या वेळी महाविद्यालयाच्या प्राचार्या डॉ. कांता कांबळे, रत्नागिरी जिल्हा ग्रंथालय संघाचे अध्यक्ष श्रीकृष्ण साबणे, प्रा. सुदीप पवार उपस्थित होते.
------
फणसवणे येथे
बिबट्याचा संचार
संगमेश्वर ः शुक्रवारी (ता. २१) सकाळी आठ वाजण्याच्या सुमारास फणसवणे कपिलनगर येथील गुरववाडी रस्त्याने बिबट्या फिरताना दिसला. बिबट्याच्या मुक्त संचारामुळे छोटे वाहनधारक आणि पाळीव जनावरे, पादचारी यांच्या जीविताला धोका निर्माण झाला आहे. त्या बिबट्याचा बंदोबस्त करा, अशी मागणी ग्रामस्थांनी केली आहे. बिबट्या दिसल्यामुळे ग्रामस्थांमध्ये भितीचे वातावरण पसरले आहे.
-------------
कोळंबे शाळेत
शिक्षण परिषद
संगमेश्वर ः शिक्षणाची गुणवत्तावाढ व शैक्षणिक विषयाचे विचारमंथन करण्यासाठी संगमेश्वर तालुक्यातील बीट कोळंबे येथील कुरधुंडा उर्दू केंद्राची शिक्षण परिषद कोळंबे नं. २ शाळेत झाली. विद्यार्थ्यांनी उत्तम परिपाठ, सुरेल समूहगीत व स्वागतगीत सादर करून शिक्षण परिषदेला सुरवात झाली. शिक्षण परिषदेच्या अध्यक्षस्थानी केंद्रप्रमुख मीनाक्षी नाचणकर, शाळा व्यवस्थापन समिती अध्यक्षा प्रणिता टाकळे, उपाध्यक्षा निधी भरणकर, सर्व शाळांचे मुख्याध्यापक उपस्थित होते. जिल्हा शिक्षण व प्रशिक्षण संस्थेच्या मार्गदर्शन सूचनेनुसार, केंद्रस्तरीय शिक्षण परिषदेत निपुण महाराष्ट्र चाचणी, निपुण मित्रनोंदणी, गट आढावा आणि अध्ययन निष्पत्ती मासिक नियोजन या विषयवार मार्गदर्शक करण्यात आले.