खेड -ते शिवतर मार्गावर वडाप तेजीत

खेड-शिवतर मार्गावर वडाप तेजीत
दौलताराम मोरे यांचा आरोप : पोलिसांना निवेदन
सकाळ वृत्तसेवा
खेड, ता. २५ : खेड कॅफे कॉर्नर ते शिवतर या मार्गावर काही रिक्षाचालक रोज अवैध प्रवासी वाहतूक करत असल्याचा गंभीर आरोप नागरिकांकडून केला आहे. या संदर्भात नामदेव दौलताराम मोरे यांनी खेड पोलिस ठाण्यात निवेदन दिले असून, कारवाईची मागणी केली आहे.
पोलिसांना दिलेल्या निवेदनात म्हटले आहे की, प्रवासी वाहनांना निश्चित मार्ग व परवानगी असतानाही काही रिक्षाचालकांकडून मनमानी केली जाते. रिक्षामधून १० ते १२ प्रवासी घेऊन वाहतूक केली जाते. त्यामुळे अधिकृत वाहनचालकांचे आर्थिक नुकसान होत आहे तसेच प्रवाशांच्या सुरक्षेचाही प्रश्न निर्माण झाला आहे. जादा प्रवासी भरल्यामुळे अपघाताची भीती कायम आहे. मागील काळातही या मार्गावर अनेकदा प्रवासी वाहनांमध्ये गोंधळ, धोकादायक वाहन चालवणे, वाहनचालकांमध्ये वाद निर्माण होणे असे प्रकार झाले आहेत. खेड व रत्नागिरी रस्ते वाहतूक अधिकाऱ्यांनी संबंधितांवर कारवाई करा, असे मोरे यांनी पोलिस ठाण्यात दिलेल्या निवेदनात नमूद केलेले आहे. नियमांचे उल्लंघन करणाऱ्या रिक्षांना थांबवून त्यांच्या वाहनांची तपासणी करून आवश्यक ती कायदेशीर कारवाई करावी, अशी मागणीही केली आहे तसेच, मान्यताप्राप्त वाहनांनाच प्रवासी वाहतुकीची परवानगी द्यावी आणि प्रवाशांच्या सुरक्षिततेला प्राधान्य द्यावे, अशी मागणी त्यांनी केली आहे. या निवेदनाची प्रत खेड पोलिस ठाणे व प्रादेशिक परिवहन अधिकारी कार्यालयालाही पाठवण्यात आली आहे.