सहकारी सोसायटीची चौकशी

खेडमधील सहकारी सोसायटीची चौकशी
सहकार आयुक्तांचे आदेश; जिल्हा उपनिबंधक करणार कार्यवाही
सकाळ वृत्तसेवा
खेड, ता. १० : तालुक्यातील सर्व विविध कार्यकारी विकास सेवा सहकारी सोसायटीच्या कारभारात गंभीर अनियमिततेच्या तक्रारी येत आहेत. त्यामुळे पुणे येथील सहकार आयुक्त व निबंधक, सहकारी संस्था यांनी चौकशी करण्याचे आदेश दिले आहेत.
सहकारी संस्था विभागाचे उपआयुक्त (कर्मचारी) यांच्या पत्रानुसार संबंधित सोसायटीविरूद्ध दाखल झालेल्या तक्रारींच्या अनुषंगाने शासन परिपत्रक २१ सप्टेंबर २०२५ च्या शासननिर्णयाला अधीन राहून चौकशी करण्यात येणार आहे. या संदर्भातील मूळ तक्रारदार दीपक मोहिते यांच्या अर्जाचा प्राथमिक तपास करून पुढील चौकशीसाठी जिल्हा उपनिबंधकांना निर्देश देण्यात आले आहेत. समाजकार्यात कार्यरत असलेल्या तक्रारदारांनी सोसायटीच्या कार्यपद्धतीत अनियमितता, कारभारात सुसूत्रता नसल्याचे तसेच सदस्यांचे आर्थिक हित बाधित झाल्याची तक्रार केली होती. २००० ते २०२४ या कालावधीत सोसायटीच्या कारभारासंबंधी सर्व संबंधित कागदपत्रे, बैठकीचे ठराव व आर्थिक नोंदी तपासणीसाठी उपलब्ध करून देण्याचे आदेश त्या पत्राद्वारे संबंधित सोसायटीला देण्यात आले आहेत. चौकशीवेळी आवश्यक कागदपत्रे विलंब न करता सादर करण्याचे सक्त निर्देशही दिले असून, अनियमितता आढळल्यास पुढील शिस्तभंगात्मक कारवाईला तोंड द्यावे लागेल, असेही पत्रात नमूद केले आहे. याबाबत पुढील चौकशी अहवाल जिल्हा उपनिबंधकांकडून राज्य कार्यालयाला पाठवण्यात येणार आहे. या कारवाईमुळे तालुक्यातील सहकारी संस्थांच्या कार्यप्रणालीकडे पुन्हा एकदा लक्ष वेधले गेले असून, पारदर्शकता आणि जबाबदारी सुनिश्चित करण्यासाठी ही चौकशी महत्त्वाची ठरणार आहे.