जिल्ह्याला शेती नुकसानीसाठी ५ कोटी ६ लाख ६० हजार प्राप्त

जिल्ह्याला शेती नुकसानीपोटी
५ कोटी ६ लाख ६० हजार प्राप्त
सकाळ वृत्तसेवा
ओरोस, ता. ११ ः जिल्ह्यात २०२५-२६ वर्षामध्ये अवकाळी पाऊस, अतिवृष्टी या नैसर्गिक आपत्तींमुळे शेतपिके, शेतजमीन, बियाणे याबाबत झालेल्या नुकसानाकरिता शासनाकडून ५ कोटी ६ लाख ६० हजार रुपये एवढे नुकसान झाले आहे. ही नुकसान भरपाईची रक्कम ई-केवायसीव्दारे लाभार्थ्यांना वाटप होणार आहे. यासाठी शेतकरी, लाभार्थींनी आपल्या तहसील, तलाठी कार्यालयातून विशिष्ट क्रमांक प्राप्त करून घेऊन जवळच्या महा ई-सेवा केंद्रावर जाऊन स्वत:ची ई-केवायसी करून घ्यावी. यानंतरच लाभार्थ्यांच्या बँक खात्यात नुकसान भरपाईची रक्कम जमा होणार आहे, अशी माहिती जिल्हा प्रशासनाकडून देण्यात आली आहे.
नुकसान भरपाईची रक्कम थेट बँक खात्यात जमा होण्याच्या अनुषंगाने नुकसानग्रस्त शेतकरी, लाभार्थींनी तलाठी, तहसील कार्यालय, नजीकच्या महा ई-सेवा केंद्र, आपले सरकार सेवा केंद्र येथे भेट देऊन आवश्यक कागदपत्रांची पूर्तता करावी, असे आवाहन जिल्ह्यातील सर्व संबंधित लाभार्थ्यांना जिल्हा प्रशासनामार्फत करण्यात आले आहे.
अतिवृष्टीमुळे जूनमध्ये झालेल्या नुकसानीपोटी १२ लाख ६३ हजार रुपये एकूण भरपाई मिळाली आहे. जून ते सप्टेंबर या चार महिन्यांत झालेल्या बियाणे व इतर नुकसानीसाठी १५ लाख ९४ हजार, ऑगस्टमध्ये झालेल्या नुकसानीची ४ लाख ७९ हजार, फेब्रुवारी ते मे या चार महिन्यांत झालेल्या नुकसानीचे ५४ लाख ४१ हजार, सप्टेंबरमध्ये झालेल्या नुकसानीचे ८ लाख २९ हजार, जूनमध्ये झालेल्या नुकसानीकरिता ८८ हजार, जुलैमध्ये झालेल्या नुकसानीपोटी ९७ हजार, ऑक्टोबरमध्ये झालेल्या नुकसानीचे ४ कोटी ८ लाख ६९ हजार रुपये अशाप्रकारे एकूण ५ कोटी ६ लाख ६० हजार रुपये एकूण नुकसानभरपाई प्राप्त झाली आहे.
..................