''आधार, वैश्विक कार्डचे संलग्नीकरण आवश्यक''

‘आधार, वैश्विक कार्डचे
संलग्नीकरण आवश्यक’
सकाळ वृत्तसेवा
मालवण, ११ : तालुक्यातील संजय गांधी निराधार अनुदान योजना, श्रावणबाळ राज्य निवृत्ती वेतन योजना आणि इंदिरा गांधी राष्ट्रीय दिव्यांग निवृत्ती वेतन योजनेच्या लाभार्थींनी आपले आधार कार्ड आणि वैश्विक दिव्यांग ओळखपत्र संबंधित योजनेशी संलग्न करावे, असे आवाहन प्रभारी तहसीलदार प्रिया परब यांनी केले आहे.
सामाजिक न्याय व विशेष सहाय्य विभागाने विशेष सहाय्य योजनेतील सर्व लाभार्थींना त्यांच्या आधार कार्डाचे योजनेशी संलग्नीकरण करणे बंधनकारक केले आहे. दिव्यांग कल्याण विभागाने नुकत्याच काढलेल्या शासन निर्णयानुसार दिव्यांग व्यक्तींना शासनाकडून राबविण्यात येणाऱ्या विविध योजना व सवलतींचा लाभ मिळविण्यासाठी वैश्विक दिव्यांग ओळखपत्र असणे अनिवार्य करण्यात आले आहे. या दोन्ही योजनांच्या दिव्यांग लाभार्थींनी आपले वैश्विक कार्ड व आधार कार्ड त्वरित संलग्नीकरण करून घ्यावे; अन्यथा लाभापासून वंचित राहण्याची शक्यता आहे, असेही त्यांनी म्हटले आहे.