समुद्र, पर्यावरण, जबाबदार पर्यटनासाठी जानेवारीत सागर महोत्सव

-rat११p४६.jpg-
२५O१००७१
रत्नागिरी : माहिती देताना डावीकडून नंदकुमार पटवर्धन व जगदीश खेर.
----
समुद्र, पर्यावरण, पर्यटनासाठी सागर महोत्सव
नंदकुमार पटवर्धन ः जानेवारीत रत्नागिरीत चार दिवस आयोजन
सकाळ वृत्तसेवा
रत्नागिरी, ता. ११ : आसमंत बेनेव्होलन्स फाउंडेशनतर्फे रत्नागिरीत १५ ते १८ जानेवारी २०२६ दरम्यान ‘सागर महोत्सव- सीव्हर्स’ या समुद्र, पर्यावरण आणि जबाबदार पर्यटनविषयक चार दिवसीय महोत्सवाचे आयोजन करण्यात आले आहे. सागरी जैवविविधतेचा अभ्यास, तज्ज्ञांची व्याख्याने, खाडी, कांदळवन सहल आणि सांस्कृतिक कार्यक्रमांच्या माध्यमातून समुद्राबद्दल जागरूकता व सहभाग वाढवणे हा महोत्सवाचा मुख्य हेतू असून, महोत्सवाचे चौथे वर्ष आहे, अशी माहिती आसमंतचे संस्थापक संचालक नंदकुमार पटवर्धन व संचालक जगदीश खरे यांनी आज दिली.
१५ जानेवारीला सकाळी खारफुटी जंगलाच्या अभ्यासफेऱ्यांद्वारे महोत्सवाची सुरुवात होणार आहे. यात तज्ज्ञ हेमंत कारखानीस व शांभवी चव्हाण खारफुटी व किनारी परिसंस्थेची माहिती सांगतील. कर्ला जेटी येथून दोन बोटींद्वारे फेऱ्या सुटतील. यानंतर सायंकाळी भाटकरवाडा परिसरातील शैवाळ, खडकाळ किनारा आदींचा अभ्यास प्रदीप पाताडे व डॉ. अमृता भावे यांच्या मार्गदर्शनाखाली होणार आहे. १६ जानेवारीला महोत्सवाचे उद्‍घाटन सकाळी ९ वा. मुख्य अतिथी डॉ. शैलेश नायक यांच्या हस्ते होणार आहे. या प्रसंगी जिल्हाधिकारी, राष्ट्रीय समुद्रविज्ञान संस्थेचे संचालक, पर्यटन विभागाचे सचिव, मत्स्य महाविद्यालयाचे सहयोगी अधिष्ठाता उपस्थित राहणार आहेत. राष्ट्रीय समुद्र विज्ञान संस्थेचे निवृत्त मुख्य वैज्ञानिक डॉ. बबन इंगोले हे समुद्री खनिजसंपत्ती आणि जैवविविधतेवरील परिणाम यावर बोलतील. प्रसिद्ध सागरी पर्यावरणशास्त्र डॉ. दीपक आपटे यांची मुलाखत डॉ. अमृता भावे घेतील. त्यानंतर डॉ. संतोष शिंत्रे यांचे पर्यावरण संप्रेषण या विषयावर व्याख्यान होईल. डॉ. ईशा बोपर्डीकर या सागरी सस्तन प्राणी या विषयावर सादरीकरण करतील.
१७ जानेवारी रोजी सकाळी भाट्ये समुद्रकिनारी पुळणी किनारा अभ्यासफेरी आयोजित केली आहे. राष्ट्रीय समुद्र विज्ञान संस्थेचे मुख्य वैज्ञानिक डॉ. नरसिंह ठाकूर हे सागरी संशोधन ते उद्योगविश्व या विषयावर आणि ज्येष्ठ शास्त्रज्ञ समीर डामरे हे महासागरातील निर्जीव संसाधने या विषयावर सादरीकरण करतील. वरिष्ठ शास्त्रज्ञ डॉ. शेखर मांडे यांचे हवामान बदल आणि जनसहभागाची भूमिका या विषयावर व्याख्यान होईल.
--------
चौकट
बक्षीस वितरणाने समारोप
१८ जानेवारीला दिवसाची सुरवात पुन्हा भाट्ये येथील पुळणी किनारा अभ्यास फेरीने होईल. या दिवशी ज्येष्ठ शास्त्रज्ञ डॉ. संजय देशमुख हे आपल्या आतला महासागर-स्वप्नातला, सर्व जीवनाला आधार देणाऱ्या अनंत निळ्या रंगाचा शोध घ्या आणि त्याचे रक्षण करा, या विषयावर सादरीकरण करतील. दुपारी ‘संगीत कुर्माख्यान’ – मॅंग्रोव्ह फाउंडेशनचे लोकनाट्य सादर केले जाईल. पर्यटन विभागाच्या उपसंचालक शमा पवार या जबाबदार पर्यटन या विषयावर व्याख्यान देणार आहेत. यानंतर समुद्रकिल्ल्यांच्या वन्यजीव सर्वेक्षणाचा अनुभव, सहभागींना बक्षीस वितरण, महोत्सवाचा समारोप करण्यात येईल.