बोटीतील तरुणाने समुद्रात उडी मारली

बोटीतील तरुणाने समुद्रात घेतली उडी
रत्नागिरीतील घटना ; पोलिसांकडून शोधकार्य सुरू
सकाळ वृत्तसेवा
रत्नागिरी, ता. ११ ः रत्नागिरी येथील समुद्रात मासेमारीसाठी बोटीतून गेलेल्या तरुणाने अचानक मिरकरवाडा येथील समुद्रात उडी मारली. त्याचा शोध सुरू आहे. विनायक बाळकृष्ण दळवी (रा. भडे पिंपळवाडी, ता. लांजा) असे समुद्रात उडी मारलेल्या तरुणाचे नाव आहे. ही घटना बुधवारी (ता. १)) सकाळी आठच्या सुमारास घडली.
तालुक्यातील भडे-पिंपळवाडी येथील विनायक दळवी हे उपजीविकेसाठी रत्नागिरीतील मासेमारी बोटीवर काम करत होते. मागील चार वर्षांपासून ते मिरकरवाडा येथील रफीक (पप्पू) यांच्या बोटीवर कामाला होते. काल सकाळी ८ वाजण्याच्या सुमारास बोट समुद्रात असताना विनायक दळवी यांनी अचानक चालत्या बोटीतून समुद्रात उडी घेतली. ही घटना लगेचच बोटीवरील इतर सहकाऱ्यांच्या लक्षात आली. बोटीच्या मालकाला घटनेची माहिती मिळताच रफीक यांनी तातडीने धाव घेतली आणि विनायक दळवी यांचा समुद्रात कसून शोध सुरू केला. सोबत काम करणाऱ्या सहकाऱ्यांकडून माहिती घेण्यात आली असता, विनायक दळवी यांनी नेमक्या कोणत्या कारणामुळे समुद्रात उडी मारली, हे अद्याप स्पष्ट होऊ शकलेले नाही. बोटीचे मालक रफीक यांनी मिरकरवाडा येथील पोलिस ठाण्यात या घटनेची नोंद केली आहे. पोलिस अधिकारी चव्हाण हे या घटनेचा पुढील तपास करत आहेत आणि विनायक दळवी यांचा शोध घेण्याचे कार्य युद्धपातळीवर सुरू आहे.