शेकडो काजूची कलमे आगीमध्ये होरपळली

10493

शेकडो काजूची कलमे
आगीमध्ये होरपळली

म्हापण फणसवडा येथे मोठी हानी

सकाळ वृत्तसेवा
म्हापण, ता. १३ ः म्हापण फणसवडा परिसरात काजू बागेला लागलेल्या आगीत शेतकऱ्यांचे मोठे नुकसान झाले. ही घटना शुक्रवारी (ता. १२) दुपारच्या सुमारास घडली. डोंगर परिसरातून धूर येताना पाहून स्थानिकांनी धाव घेतली; मात्र आगीने रौद्ररूप धारण केले होते.
ग्रामस्थांनी आग आटोक्यात आणण्याचा प्रयत्न केला. मात्र, आगीची तीव्रता व पाण्याचा अभाव यामुळे बहुतांश कलमे जळून खाक झाली. यात प्रणव ठाकूर, प्रशांत ठाकूर, किरण ठाकूर, रामकृष्ण ठाकूर, रवी नांदोसकर या शेतकऱ्यांचे मोठे नुकसान झाले. काही महिन्यांपूर्वीच आंबेव्हाळ येथे लागलेल्या आगीत ३५० हुन अधिक कलमे जळून खाक झाली होती. सतत घडणाऱ्या या प्रकारांमुळे शेतकरी हतबल झाले आहेत. प्रशासनाकडून नुकसान भरपाई मिळावी, अशी मागणी नुकसानग्रस्त शेतकऱ्यांनी केली आहे.