महात्मा गांधी यांच्यामुळे जगाला नैतिकतेचे अधिष्ठान ः कांडर

10557

महात्मा गांधी यांच्यामुळे जगाला
नैतिकतेचे अधिष्ठान ः कांडर

ओणीतील व्याख्यानमालेचा प्रारंभ

कणकवली, ता. १४ : गांधी हे केवळ व्यक्तिमत्त्व नाही, तर एक चळवळ आहे. त्यांनी जगाला नैतिकतेचे अधिष्ठान दिले. गांधी नीट समजून घ्यायचे असतील तर आपल्यालाच आधी चांगले माणूस बनावे लागेल, असे प्रतिपादन कवी अजय कांडर यांनी केले. ओणी येथील ‘अजूनही जिवंत आहे गांधी’ या व्याख्यानमाला कार्यक्रमात ते बोलत होते.
गांधीतीर्थ स्वच्छ अभियानाच्या निमित्ताने ओणी पंचक्रोशी शिक्षण संस्थेतर्फे गांधी व्याख्यानमालेचा शुभारंभ कवी अजय कांडर यांच्या व्याख्यानाने करण्यात आला. यावेळी श्री.कांडर म्‍हणाले की, ‘हे जग सुंदर बनविण्याची प्रक्रिया जोपर्यंत चालू राहणार आहे, तोपर्यंत गांधी राहणार आहेत. कारण जगातलं जे जे सुंदर आहे त्या सगळ्याचा स्वीकार गांधींनी केला होता.’
कार्यक्रमाच्या अध्यक्षस्थानी ॲड. वासुदेव तुळसणकर होते. यावेळी प्राचार्य राठोड, सरकारी वकील ॲड. भावचंद्र सुपेकर, कार्यवाह ॲड. गुरुदत्त खानविलकर, शाळा समिती अध्यक्ष वागळे, संचालक डॉ. शैलेश शिंदे-देसाई, डॉ. महेंद्र मोहन, मुख्याध्यापक विनोद मिरगुले आदी उपस्थित होते.
कवी कांडर म्‍हणाले, ‘महात्मा गांधी हे त्यांच्या हयातीत आणि मृत्यू पश्चात एक दंतकथा बनून राहिले आहेत. जगभरात अहिंसेने आणि निव्वळ माणूस म्हणून जगू पाहणाऱ्या लोकांचे ते प्रेरणास्थान आहेत. विशेष म्हणजे गांधी हत्येनंतरही त्यांच्या विचारांचा परिणामकारक अंश जगाच्या कणाकणात व्यापून राहिला आहे. गांधींची जीवनदृष्टी आणि विचारांचा पाया हा ‘सत्याचा’ आहे. त्यामुळे काळ कोणताही असो, आपल्याला ‘अजूनही जिवंत आहे गांधी!’ असेच म्हणावे लागते.’
सुनील जाधव यांनी सूत्रसंचालन केले. वाजंत्री यांनी प्रास्ताविक केले. शुभांगी शिंदे देसाई यांनी आभार मानले.