विषाणूमारक सॅनिटरी पॅड वापरा

10559

विषाणूमारक सॅनिटरी पॅड वापरा

सावंत : फोंडाघाट हायस्कूलमध्ये डिस्पोझल यंत्र

कणकवली, ता. १५ : महिलेचे आरोग्‍य चांगले राखायचे असेल तसेच आजार टाळण्यासाठी शंभर टक्के कापसापासून तयार केलेले आणि विषाणूमारक सॅनिटरी पॅडचा वापर अनिवार्य असल्याचे मत शतायुषी फाउंडेशनचे अध्यक्ष डॉ. एच. एस. सावंत यांनी व्यक्त केले.
फोंडाघाट हायस्कूलमध्ये नारी केअर सॅनिटरी पॅड व्हेंडिंग आणि डिस्पोझल यंत्राच्‍या उद्‍घाटन कार्यक्रमात डॉ. सावंत बोलत होते. ते म्‍हणाले, ‘महिलांच्या आरोग्याला मासिक पाळीच्या दरम्यान वापरल्या जाणाऱ्या निकृष्ट दर्जाच्या प्लास्टिक मिश्रित सॅनिटरी पॅडमुळे धोका निर्माण होत असल्याचे जागतिक आरोग्य संघटनेच्या अहवालात नमूद आहे. या अहवालानुसार, महिलांना उद्‍भवणारे ४२ टक्के आजार हे असेच पॅड वापरल्याने होतात. समाजाच्या भावी सुदृढ आरोग्यासाठी स्त्रीशक्तीचे आरोग्य जपणे ही काळाची गरज असल्याचे त्यांनी स्पष्ट केले.
‘स्वस्थ नारी सुखी कुटुंब’ उपक्रमांतर्गत फोंडाघाट एज्युकेशन सोसायटीच्या न्यू इंग्लिश हायस्कूल आणि महाविद्यालयात शिक्षिका आणि विद्यार्थिनींना शाळेतच दर्जेदार सॅनिटरी पॅड दैनंदिन उपलब्ध व्हावेत, यासाठी जिल्ह्यात प्रथमच स्वयंचलित व्हेंडिंग यंत्र आणि पॅडची विल्हेवाट लावणारे भुकटी (इन्सिनरेटर) यंत्र बसवले. या दोन्ही यंत्रांचे उद्‍घाटन ज्येष्ठ सामाजिक कार्यकर्ते गणपत तथा भाई चव्हाण यांच्या हस्ते करण्यात आले. यावेळी मुख्याध्यापक प्रसाद पारकर, संस्थेचे संचालक रंजन नेरुरकर, पालक वासुदेव सामंत, शतायुषी आयन शतायू वर्धानम् फाउंडेशनचे संचालक प्रवीण केळुसकर, कुंदन पाटकर, शिक्षिका आर्या भोगले, स्नेहा रेवडेकर, साईली पवार, दीक्षा पेडणेकर, प्रतिभा बडे, साईली शिंदे, श्रावणी खांदारे, ऐश्वर्या जठार, समृद्धी गोसावी, हिरकणी महिला बचत गटाच्या अध्यक्षा वैशाली पवार यांच्यासह बहुसंख्य विद्यार्थिनी उपस्थित होत्या. यावेळी काही विद्यार्थिनींनी व्हेंडिंग यंत्रात १० रुपयांचे नाणे टाकून पॅड कसे मिळते याचे प्रात्यक्षिक करून दाखविले. नारी केअर पॅडचे स्वदेशी संशोधक डॉ. श्रीपत भोसले यांच्या प्रात्यक्षिकांनंतर वंध्यत्वासारख्या समस्या निकृष्ट पॅडमुळेच होत असल्याचे लक्षात आले. त्यामुळे ही चळवळ म्हणून पुढे नेण्याचा निर्धार त्यांनी व्यक्त केला.