‘मल्टिस्पेशालिटी’ची जागा विकसित करा

10853

‘मल्टिस्पेशालिटी’ची जागा विकसित करा

उपजिल्हा रुग्णालय कृती समिती; पालिका प्रशासनासह ‘बांधकाम’ला निवेदन

सकाळ वृत्तसेवा
सावंतवाडी, ता. १५ ः येथील मल्टिस्पेशालिटी हॉस्पिटलसाठी आरक्षित भूखंडाची जागा त्वरित विकसित करण्यासंदर्भात उपजिल्हा रुग्णालय कृती समितीने पालिकेचे मुख्य कार्यकारी अधिकारी आणि सार्वजनिक बांधकाम विभागाच्या कार्यकारी अभियंत्यांना निवेदन दिले आहे.
या निवेदनात कृती समितीने महत्त्वाचे मुद्दे मांडले आहेत. त्यांच्या मते, ही जागा टाऊन प्लॅनिंगअंतर्गत २०१९ मध्ये मल्टिस्पेशालिटी हॉस्पिटलच्या उभारणीसाठी आरक्षित केली आहे. मात्र, आरक्षण होऊन बरीच वर्षे उलटली तरी संबंधित विभागाकडून जागेच्या विकासासाठी किंवा हॉस्पिटल उभारणीसाठी कोणत्याही प्रकारच्या ठोस हालचाली झालेल्या दिसत नाहीत. जनतेची गेल्या अनेक वर्षांपासून मल्टिस्पेशालिटी हॉस्पिटलची मागणी आहे. या पार्श्वभूमीवर आरक्षित भूखंडाचे मालक योग्य शासकीय मोबदल्यात आपली जागा शासनास देण्यास तयार आहेत. जागा मालकांनी यासंदर्भातील लेखी पत्र २६ नोव्हेंबर २०२५ ला संबंधित कार्यालयांना दिले आहे. ​या सर्व बाबींचा विचार करून, कृती समितीने पालिका आणि सार्वजनिक बांधकाम विभागाला विनंती केली आहे, की त्यांनी या महत्त्वपूर्ण जनहिताच्या प्रकल्पासाठी त्वरित आणि उचित कार्यवाही करावी. नगराध्यक्ष कार्यालयात हे निवेदन मुख्याधिकारी यांच्यावतीने तहसीलदार श्रीधर पाटील यांनी स्वीकारले. यावेळी ज्येष्ठ सामाजिक कार्यकर्ते अण्णा केसरकर, अण्णा देसाई, किशोर चिटणीस, महेश परूळेकर, काका मांजरेकर, रवी जाधव, रूपा मुद्राळे, रवींद्र ओगले, राजू कासकर, संजय लाड, कौस्तुभ पेडणेकर, नंदू घाटे, जितेंद्र मोरजकर, राजू केळुसकर, फ्रान्सिस रॉड्रीक्स, नारायण पंतवैद्य, मुकुंद गवंडळकर आदी उपस्थित होते.