भात खरेदी डिसेंबरनंतरच?

भात खरेदी डिसेंबरनंतरच?

२३०० जणांची नोंदणी; ‘बारदाणां’चीही प्रतीक्षाच

सकाळ वृत्तसेवा
वैभववाडी, ता. १५ ः जिल्ह्यात भात खरेदीला आवश्यक बारदाणे अजूनही उपलब्ध झालेली नाहीत. त्यामुळे यावर्षीची भात खरेदी २० डिसेंबरनंतरच सुरू होईल, असा अंदाज आहे. आतापर्यंत २ हजार ३०० भात उत्पादकांनी नोंदणी केली आहे. एक-दोन दिवसांत बारदाणे उपलब्ध होण्याची शक्यता आहे.
जिल्ह्यात यावर्षी लांबलेल्या पावसामुळे भातपीक कापणी लांबली. त्यामुळे भात खरेदीही विलंबाने होणार हे निश्चित झाले आहे. भात खरेदी-विक्रीपूर्वी भात उत्पादकांची नोंदणी भात खरेदी केंद्रांवर ऑनलाईन केली जाते. जिल्हाधिकाऱ्यांनी ४१ केंद्रांवर भात खरेदी केंद्रांना मंजुरी दिली आहे. या केंद्रांवर ही नोंदणी पंधरा दिवसांपूर्वीपासून सुरू आहे. गेल्या पंधरा दिवसांत २ हजार ३०० शेतकऱ्यांनी नोंदणी केली आहे.
जिल्ह्यातील सर्व भात खरेदी केंद्रांनी नव्या बारदाणांची मागणी मार्केटिंग फेडरेशनकडे केली आहे. ही बारदाणे एक-दोन दिवसांत प्राप्त होणार आहेत. प्रत्येक तालुक्याला सुमारे ५००० बारदाणांची मागणी केली आहे. ही बारदाणे प्राप्त झाल्यानंतर एक-दोन दिवसांत भात खरेदी सुरू करण्याची तयारी सर्व केंद्रांनी केली आहे. तशा स्वरूपाची लगबग सर्व केंद्रांवर सुरू आहे. त्यामुळे २० डिसेंबरपर्यंत भात खरेदीला प्रारंभ होईल, अशी शक्यता आहे.
-------------
कोट
भात खरेदीसाठी आवश्यक बारदाणांची मागणी केली असून एक-दोन दिवसांत बारदाणे उपलब्ध होणार आहेत. त्यानंतर तातडीने भात खरेदी केली जाणार आहे.
- डी. आर. पाटील, मार्केटिंग अधिकारी, सिंधुदुर्ग.