सालपे-धनगरवाडी रस्त्याचे भूमिपूजन

सालपे-धनगरवाडी रस्त्याचे भूमिपूजन
लांजा ः तालुक्यातील सालपे-धनगरवाडी येथील रस्त्याला डांबरीकरणासाठी निधी मंजूर झाला. या रस्त्याचे भूमिपूजन सालपे गावच्या मानकऱ्यांच्या हस्ते झाले. तांडावस्ती सुधार योजना २०२४-२५ या योजनेतून सालपे धनगरवाडी रस्ता मजबुतीकरण व डांबरीकरणसाठी निधी मंजूर झाला आहे. अनेक वर्षांपासून धनगरवाडी येथे रस्त्याची गैरसोय होत होती. त्यामुळे नागरिकांना पायपीट करून त्रास सहन करावा लागत होता. डांबरीकरणाला लवकरच सुरवात होणार असून, या रस्त्यामुळे धनगरवाडी व परिसरातील नागरिकांची रस्त्याअभावी होणारी गैरसोय दूर होणार आहे.

‘पित्रे’मध्ये एड्स जागरूकता अभियान
साडवली ः जागतिक एड्स दिन आणि एड्स सप्ताहाचे औचित्य साधून देवरूख आठल्ये-सप्रे-पित्रे महाविद्यालयात एनएसएस विभागातर्फे विविध जनजागृतीपर कार्यक्रमांचे आयोजन करण्यात आले होते. प्रा. डॉ. प्रशांत नारगुडे यांनी एचआयव्ही/एड्स होण्याची कारणे, एड्स रुग्णातील लक्षणे, प्रतिबंधात्मक उपाय, उपचारपद्धती आणि समाजातील प्रचलित गैरसमज दूर करण्याची गरज याबाबत मार्गदर्शन केले. प्राचार्य डॉ. नरेंद्र तेंडोलकर यांनी विद्यार्थ्यांना आरोग्यजागृतीत सक्रिय योगदान देण्याचे आवाहन केले. महाविद्यालयाकडून आयोजित जागरूकता रॅलीमध्ये विद्यार्थी, अध्यापक आणि एनएसएस स्वयंसेवक सहभागी झाले होते.