आरोग्य विभागामार्फत जत्रेच्या माध्यमातून आरोग्य सेवा

आरोग्य विभागाकडून
जत्रोत्सवात शिबिर
राजापूर, ता. १५ ः तालुक्यातील देवीहसोळ येथे श्री आर्यादुर्गा देवी जत्रोत्सवाच्या निमित्ताने जिल्हा परिषद आरोग्य विभागाकडून विशेष आरोग्य तपासणी शिबिराचे आयोजन केले होते. त्यात १३८ जणांनी तपासणी करून घेतली.
जिल्हा आरोग्य अधिकारी डॉ. अनिरूद्ध आठल्ये यांच्या मार्गदर्शनाखाली जिल्ह्यातील जत्रोत्सव, यात्रा व इतर गर्दीच्या ठिकाणी नागरिकांना तत्काळ व दर्जेदार आरोग्यसेवा उपलब्ध करून देण्याच्या उद्देशाने आरोग्य तपासणी शिबिरांचे आयोजन करण्यात येत आहे. गतवर्षाप्रमाणे या शिबिरामध्ये प्राथमिक आरोग्य केंद्र धारतळे येथील वैद्यकीय अधिकारी डॉ. प्रवीण माने यांच्या नेतृत्वाखाली आरोग्य निरीक्षक प्रमोद खेडकर, आरोग्यसेवक राम धनवे, आरोग्यसेविका गीतांजली चव्हाण, नीलेश विचारे तसेच आशासेविका रेवती भोवड व नार्वेकर यांनी भाविकांना आवश्यक आरोग्यसेवा व तपासणी सुविधा उपलब्ध करून दिल्या.
शिबिरास श्री आर्यादुर्गा देवी संस्थानचे पदाधिकारी तसेच ग्रामस्थ उपस्थित होते. भाविकांनी उपक्रमाचा लाभ घेत आरोग्य विभागाच्या या उपयुक्त उपक्रमाचे कौतुक केले.