भाकड गायींच्या संगोपनासाठी अनुदान शेतकऱ्यांना द्या

भाकड गायींच्या संगोपनासाठी अनुदान द्या
ःआमदार शेखर निकम ः देखभालीचा वाढता आर्थिक खर्च, शेतीसाठी शेणमुत्राचा वापर
सकाळ वृत्तसेवा
चिपळूण, ता. १६ : हिवाळी अधिवेशनादरम्यान विधानसभेत आमदार शेखर निकम यांनी भाकड गायींच्या संगोपनाचा प्रश्न आणि त्याचा नैसर्गिक शेतीशी असलेला थेट संबंध उपस्थित करत सभागृहाचे लक्ष वेधले. कोंडवाडे उभारणीतील प्रत्यक्ष अडचणी, भाकड गायींच्या देखभालीचा वाढता आर्थिक भार आणि नैसर्गिक शेतीसाठी या गायींच्या शेणमुत्राचा प्रभावी वापर या महत्त्वाच्या मुद्द्यांवर त्यांनी सरकारकडे स्पष्ट भूमिका मांडण्याची मागणी केली.
हिवाळी अधिवेशनात आमदार शेखर निकम यांनी भाकड गायींच्या संगोपनाचा प्रश्न सभागृहात प्रभावीपणे मांडला. भाकड गायींच्या संगोपनासाठी शेतकऱ्यांनी अनुदानाची गरज आहे. कोकणात सध्या तालुकास्तरावर कोंडवाडे उभारणे अत्यंत कठीण झाले आहे. जागेचा अभाव, निधीची कमतरता आणि व्यवस्थापनातील अडचणी यामुळे अनेक ठिकाणी कोंडवाडे नाहीत. परिणामी, शेतकऱ्यांकडे असलेल्या भाकड गायींच्या संगोपनाची जबाबदारी थेट त्या त्या शेतकऱ्यांवरच येते. त्यामुळे शेतकऱ्यांना आर्थिक भार सहन करावा लागत आहे. शासनाकडून भाकड गायींसाठी देण्यात येणारे ५० रुपये प्रतिदिन अनुदान हे कोंडवाड्यांपुरते मर्यादित न ठेवता, प्रत्यक्ष भाकड गाय सांभाळणाऱ्या वैयक्तिक शेतकऱ्यालाच द्यावे, अशी मागणी निकम यांनी केली. याचबरोबर शासन नैसर्गिक शेतीचा आग्रह धरत असताना भाकड गायींच्या शेणमुत्राचा वापर करून नैसर्गिक शेतीसाठी आवश्यक असलेली खते, जीवामृत, गोमूत्र अर्क आदी तयार करण्यासाठी अधिकृत केंद्र उभारण्यास शासन मदत करणार का, असा प्रश्नही आमदार निकम यांनी उपस्थित केला.

चौकट
सकारात्मक विचार
भाकड गायींच्या संगोपनासाठी अनुदान द्यावे या उपस्थित झालेल्या प्रश्नांना उत्तर देताना पशुसंवर्धनमंत्री पंकजा मुंडे यांनी सभागृहात सांगितले की, या विषयावर जर शासनाकडे व्यवहार्य, नियोजनबद्ध आणि चांगला प्रस्ताव आला तर त्यावर सकारात्मक विचार केला जाईल.
----