गोव्यातील निवडणूक प्रचार फलक बांद्यात झळकला

गोव्यातील निवडणूक प्रचार
फलक बांद्यात झळकला

प्रशासनाच्या भूमिकेकडे लक्ष

सकाळ वृत्तसेवा
बांदा, ता. १६ ः गोव्यातील जिल्हा परिषद निवडणूक २० डिसेंबरला होत असली, तरी त्याची धग थेट सिंधुदुर्ग जिल्ह्यातील बांदा शहरात पोहोचल्याचे चित्र सध्या पाहायला मिळत आहे. गोव्यातील तोरसे मतदारसंघातील उमेदवारांच्या प्रचाराचे फलक बांदा शहरात मुख्य बाजारपेठेत झळकल्याने परिसरात एकच चर्चा सुरू झाली आहे.
गोव्याला लागून असलेले बांदा शहर ही मोठी बाजारपेठ असून, उत्तर गोव्यातील पेडणे तालुक्यातील अनेक गावांचा व्यापार व दैनंदिन व्यवहार अवलंबून आहेत. गोव्यातील या परिसरातील ९० टक्के लोक खरेदीसाठी बांदा बाजारपेठेत येतात. याच पार्श्वभूमीवर गोव्यातील मतदारांना आकर्षित करण्यासाठी उमेदवारांकडून येथील बाजारपेठेत प्रचार फलक लावल्याचे बोलले जात आहे; मात्र परराज्यातील निवडणुकीचा प्रचार सिंधुदुर्ग जिल्ह्यात करणे कायदेशीर आहे का, असा प्रश्न उपस्थित होत असून, निवडणूक आचारसंहिता आणि प्रशासनाच्या भूमिकेबाबतही चर्चा रंगली आहे. एकीकडे निवडणुकीचा प्रचार रंगात येत असताना, दुसरीकडे सीमापार लावलेले हे फलक प्रशासनाचे लक्ष वेधून घेणार का, याकडे सर्वांचे लक्ष लागले आहे. दरम्यान, बांदा शहरात गोव्यातील निवडणुकीसाठी रिंगणात राहिलेल्या उमेदवारांचे लागलेले हे फलक सध्या राजकीय चर्चेचा केंद्रबिंदू ठरत आहेत.