झाडगाव येथील तरुणाची आत्महत्या

झाडगाव येथील
तरुणाची आत्महत्या
रत्नागिरी ः शहरातील झाडगाव-झोपडपट्टी येथील तरुणाने गळफास घेऊन आत्महत्या केली. उत्तरीय तपासणीसाठी त्याचा मृतदेह जिल्हा शासकीय रुग्णालयात आणला होता. सुनील चंद्रकांत माने (वय २६, रा. झाडगाव-झोपडपट्टी, रत्नागिरी) असे आत्महत्या केलेल्या तरुणाचे नाव आहे. ही घटना मंगळवारी (ता. १६) सकाळी साडेनऊच्या सुमारास निदर्शनास आली. पोलिसांकडून मिळालेल्या माहितीनुसार, माने याने कोणत्यातरी अज्ञात कारणातून घराच्या छताच्या लोखंडी बाराला नायलॉनची साडी बांधून आत्महत्या केली. नातेवाईक व घरातील मंडळीच्या लक्षात आल्यानंतर त्याला खाली उतरवून तत्काळ जिल्हा शासकीय रुग्णालयात दाखल केले होते; मात्र उपचारापूर्वीच त्याचा मृत्यू झाला होता.
------------
मद्यपान प्रकरणी
संशयितांवर गुन्हा
दापोली ः तालुक्यातील फणसू-दाभिळ येथील रस्त्याच्या कडेला झाडाखाली मद्यपान करणाऱ्या प्रौढाविरूद्ध दापोली पोलिसात गुन्हा दाखल केला आहे. रघुनाथ बाळू मांडवकर (वय ४७, रा. फणसू-माळवाडी ता. दापोली) असे संशयित प्रौढाचे नाव आहे. ही घटना सोमवारी (ता. १५) दुपारी पावणेदोनच्या सुमारास फणसू-दाभिळ रस्त्यावर निदर्शनास आली. पोलिसांकडून मिळालेल्या माहितीनुसार, संशयित एका झाडाखाली मद्यपान करत असताना आढळला. या प्रकरणी पोलिस कॉन्स्टेबल ज्ञानेश्वर मडके यांनी दापोली पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे.
------------
शिवाजीनगर येथील
तरुणाचा आकस्मिक मृत्यू
रत्नागिरी ः शहरातील शिवाजीनगर येथील श्रीसाई अपार्टमेंटमध्ये भाड्याच्या फ्लॅटमध्ये एकटाच राहणारा तरुण बेशुद्धावस्थेत आढळला. उपचारासाठी खासगी रुग्णवाहिकेने जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी त्यांना तपासून मृत घोषित केले. मनिष सूर्यकांत दळवी (वय ३९, रा. साई अपार्टमेंट-शिवाजीनगर रत्नागिरी) असे मृत तरुणाचे नाव आहे. ही घटना रविवारी (ता. १४) रात्री साडेदहाच्या सुमारास जिल्हा शासकीय रुग्णालयात घडली. पोलिसांकडून मिळालेल्या माहितीनुसार, दळवी हे फ्लॅटच्या दरवाजासमोरील मोकळ्या पॅसेजमध्ये बेशुद्धावस्थेत पडलेले होते. याबाबत शेजाऱ्यांनी १०८ रुग्णवाहिकेला बोलावून घेतले. जिल्हा रुग्णालयात दाखल केले असता तेथील वैद्यकीय अधिकाऱ्यांनी त्यांना तपासून मृत घोषित केले. शहर पोलिस ठाण्यात आकस्मिक मृत्यूची नोंद करण्यात आली आहे.