विज्ञानाकडे सकारात्मक दृष्टीने पाहा

11398

विज्ञानाकडे सकारात्मक दृष्टीने पाहा

दीपक केसरकर ः सावंतवाडी मिलाग्रीस प्रशालेत विज्ञान प्रदर्शन

सकाळ वृत्तसेवा
​सावंतवाडी, ता. १७ ः विज्ञानामुळे मानवी जीवन सुसह्य झाले आहे. विद्यार्थ्यांनी या प्रदर्शनाकडे केवळ स्पर्धा म्हणून न पाहता, विज्ञानाकडे ‘डोळस’ पद्धतीने पाहायला हवे. शासनाच्या या व्यासपीठाचा उपयोग करून विद्यार्थ्यांनी आपल्या बुद्धिमत्तेच्या जोरावर देशाची प्रगती साधावी, असे आवाहन माजी शालेय शिक्षण मंत्री तथा आमदार दीपक केसरकर यांनी येथे केले.
येथील मिलाग्रीस हायस्कूलमध्ये आयोजित जिल्हास्तरीय विज्ञान प्रदर्शनाचे उद्‍घाटन आमदार केसरकर यांच्या हस्ते झाले. यावेळी ते बोलत होते.​ या प्रदर्शनाचे मुख्य आकर्षण म्हणजे, आमदार केसरकर यांनी केवळ पाहुणे म्हणून उपस्थिती न लावता, प्रत्येक स्टॉलला वैयक्तिक भेट दिली. विद्यार्थ्यांनी तयार केलेले नावीन्यपूर्ण प्रयोग आणि कलाकृतींची त्यांनी बारकाईने पाहणी केली. प्रयोगांमागची संकल्पना समजून घेताना ते स्वतः एका विद्यार्थ्याच्या भूमिकेत शिरल्याचे पाहायला मिळाले. त्यांच्या या आपुलकीच्या संवादामुळे बालवैज्ञानिकांमध्ये मोठा उत्साह संचारला होता.
​या कार्यक्रमाला शिक्षण क्षेत्रातील अनेक दिग्गज उपस्थित होते. यामध्ये ​शिक्षण विभाग माध्यमिक शिक्षणाधिकारी कविता शिंपी, उपशिक्षणाधिकारी अप्सरा बेगम आवटी, गटशिक्षणाधिकारी सविता परब, ए. एम. वडाळ, ​विज्ञान मंडळ जिल्हाध्यक्ष पांडुरंग कातकर, बी. एस. कांबळे, शिवाजी गाबीत (प्रशासकीय अधिकारी), विस्तार अधिकारी लक्ष्मीकांत ठाकूर, राजाराम मर्गज, ​शाळा प्रशासन मुख्याध्यापक रिचर्ड सालदाना, पर्यवेक्षिका संध्या कुमठेकर,​ डॉ. उदयसिंग पाटील, प्रसाद ओगले, गणेश मर्गज आदी उपस्थित होते. ​अनिता सडवेलकर-गावडे यांनी सूत्रसंचालन केले.
......................
विज्ञानाचा वापर दैनंदिनीतही करा
विद्यार्थ्यांनी विज्ञानात दाखवलेली रुची पाहून श्री. केसरकर यांनी त्यांचे मनोबल वाढवले. हे विज्ञान केवळ प्रदर्शनापुरते मर्यादित न ठेवता त्याचा दैनंदिन जीवनात त्याचा वापर करा, असा मोलाचा सल्लाही त्यांनी विद्यार्थ्यांना दिला. या प्रदर्शनाला जिल्हाभरातून शिक्षक आणि विद्यार्थी मोठ्या संख्येने उपस्थित होते.