चौके नळ योजनेची पाईपलाईन फुटली

चौके नळ योजनेची पाईपलाईन फुटली
‘महावितरण’चा प्रताप ः दोन महिने उलटूनही दुर्लक्ष, ग्रामस्थ आक्रमक
सकाळ वृत्तसेवा
मालवण, ता. १८ ः कसाल-मालवण रस्त्यावरील भूमिगत वीज वाहिनीच्या कामासाठी करण्यात आलेल्या खोदाईमुळे चौके ग्रामपंचायतीच्या नळपाणी योजनेची पाईपलाईन फुटली आहे. गेल्या दोन महिन्यांपासून वारंवार पाठपुरावा करूनही महावितरणने याकडे दुर्लक्ष केल्याने संतप्त ग्रामस्थांनी आता आक्रमक पवित्रा घेतला आहे. या पार्श्वभूमीवर गावचा पाणीप्रश्न तातडीने न सुटल्यास कायदा-सुव्यवस्थेचा प्रश्न निर्माण होण्याची शक्यता निर्माण झाली आहे.
महावितरण कंपनीकडून सध्या कसाल-मालवण मार्गावर भूमिगत वीज वाहिन्या टाकण्याचे काम सुरू आहे. रस्त्याच्या दुतर्फा खोदाई करताना जमिनीखालील पाणीपुरवठ्याची पाईपलाईन महावितरणच्या ठेकेदाराकडून तोडण्यात आली. यामुळे चौके गावाचा पाणीपुरवठा पूर्णपणे विस्कळीत झाला असून, ऐन उन्हाळ्याच्या तोंडावर ग्रामस्थांना पाण्यासाठी वणवण करावी लागत आहे. या पाईपलाईनच्या तोडफोडीबाबत सरपंच पी. के. चौकेकर यांनी स्थानिक अभियंत्यांचे लक्ष वेधले होते. पाईपलाईन दुरुस्त झाल्याशिवाय वीज वाहिनीचे काम पुढे करू नये, अशा सूचनाही ग्रामपंचायतीने दिल्या होत्या. महावितरणने दुरुस्तीचे आश्वासन दिले खरे मात्र दोन महिने उलटूनही त्यावर कोणतीही कारवाई झालेली नाही. अलीकडेच झालेल्या ग्रामसभेत या प्रश्नावरून ग्रामस्थांनी जोरदार संताप व्यक्त केला होता.
वाढता तणाव लक्षात घेता आज सरपंच चौकेकर, तंटामुक्ती अध्यक्ष नितीन गावडे व ग्रामस्थांनी पोलीस निरीक्षक मारुती जगताप यांची भेट घेतली. श्री. जगताप यांनी प्रकरणाचे गांभीर्य ओळखून तातडीने महावितरणचे अभियंता सचिन मेहेत्रे यांच्याशी संपर्क साधला. संबंधित ठेकेदाराला आजच्या आज पाईपलाईन दुरुस्तीच्या सूचना द्याव्यात, असे निर्देश त्यांनी दिले. यावर, कार्यवाही सुरू असल्याचे मेहेत्रे यांनी स्पष्ट केले आहे.

कोट
आम्ही सातत्याने याबाबत पाठपुरावा करत आहोत. मात्र, महावितरण प्रशासनाला याचे गांभीर्य दिसत नाही. जर आज काम झाले नाही, तर आम्ही महावितरणचे अधीक्षक अभियंता आणि जिल्हा पोलिस अधीक्षक यांची भेट घेऊन दाद मागणार आहोत.
- पी. के. चौकेकर, सरपंच, चौके