-कनिष्ठ लिपिक पदे न भरल्यास काम बंद आंदोलन

-rat१९p१८.jpg-
२५O११८२७
रत्नागिरी ः कनिष्ठ लिपिकांच्या रिक्त पदांच्या भरतीला होणाऱ्या विलंबाच्या निषेधार्थ येथील कोकण बोर्डातील कर्मचाऱ्यांनी निदर्शने केली.
------- --
कनिष्ठ लिपिक पदे न भरल्यास काम बंद
राज्य माध्यमिक शिक्षण मंडळ ; कर्मचाऱ्यांची कार्यालयासमोर निदर्शने
सकाळ वृत्तसेवा
रत्नागिरी, ता. १९ : महाराष्ट्र राज्य माध्यमिक व उच्च माध्यमिक शिक्षण मंडळांतर्गत नऊ विभागीय मंडळ कार्यालय आहेत. त्या अंतर्गत येणाऱ्या कनिष्ठ लिपिकांची मोठ्या प्रमाणात पदे रिक्त आहेत. ती भरण्याबाबत राज्य मंडळाने शासनाला प्रस्ताव दिला आहे; मात्र शासनाने त्याकडे दुर्लक्ष केले आहे. यामुळे कार्यरत कर्मचाऱ्यांवर प्रचंड ताण पडत आहे. कनिष्ठ लिपिक पदांची भरती त्वरित न केल्यास २ जानेवारीपासून काम बंद आंदोलन छेडू, असा इशारा देत महाराष्ट्र राज्य माध्यमिक व उच्च माध्यमिक शिक्षण मंडळ कर्मचारी महासंघटनेच्या कर्मचाऱ्यांनी येथे आज कार्यालयासमोर निदर्शने केली.
महाराष्ट्र राज्य माध्यमिक व उच्च माध्यमिक शिक्षण मंडळांतर्गत नऊ विभागीय मंडळात कनिष्ठ लिपिकांची एकूण ५९१ पदे मंजूर आहेत. त्यापैकी ३६० ते ३७० रिक्त पदे आहेत. २३ जुलै २०२४ ला शालेय शिक्षण विभाग, महाराष्ट्र शासनाला पदे भरण्याबाबत प्रस्ताव सादर केला आहे. स्मरणपत्राद्वारे वारंवार पाठपुरावा केला आहे; परंतु शालेय शिक्षण विभागाने प्रस्ताव मंजूर करूनही राज्य मंडळाने काहीही कळवले नाही. त्यामुळे मंडळातील कनिष्ठ लिपिक भरतीची प्रक्रिया रखडली आहे. मंजूर ५९१ पैकी फक्त २४० कनिष्ठ लिपिक कार्यरत आहेत. याचा दुष्परिणाम म्हणजे कार्यरत असलेल्या कर्मचाऱ्यांवर अतिरिक्त जादा कामाचा ताण पाडत आहे. कनिष्ठ लिपिक पदासाठी मंडळ प्रशासनाने त्वरित भरती प्रक्रिया करावी अन्यथा २ जानेवारीपासून काम बंद आंदोलन करण्यात येईल, असा इशारा कर्मचाऱ्यांनी देत आज येथील कोकण बोर्डाच्या कार्यालयासमोर निदर्शने करण्यात आली.