सावंतवाडी आरोस आरोंदा वस्तीची बस अखेर पूर्ववत

11977

सावंतवाडी आरोस आरोंदा
वस्तीची बस अखेर पूर्ववत

सकाळ वृत्तसेवा
आरोंदा, ता. २० ः सावंतवाडी येथून सायंकाळी सुटणारी आरोसमार्गे आरोंदा वस्तीची एसटी बस पूर्ववत केल्याने ग्रामस्थांनी सावंतवाडी आगाराचे आभार मानले. या सुविधेमुळे विद्यार्थ्यांना मोठा आधार मिळाला आहे.
ही बस मागील काही दिवस आरोंदा येथे वस्तीला जात नसल्याने येथील विद्यार्थी व ग्रामस्थांची गैरसोय होत होती. त्यामुळे आरोंदा ग्रामपंचायत पदाधिकारी व ग्रामस्थांनी सावंतवाडी आगार येथे अधिकाऱ्यांशी चर्चा करून बस पूर्ववत करण्याची मागणी केली. त्यांच्या या मागणीला संबंधित अधिकाऱ्यांनी होकार दर्शवित बस पूर्ववत सुरू केली. ही बस आता श्री देवी सातेरी भद्रकाली मंदिर शेजारी कन्याशाळेजवळ थांबणार आहे. तेथून सकाळी सावंतवाडीला जाण्यासाठी सुटणार असून, यामुळे येथील विद्यार्थी व ग्रामस्थांची गैरसोय दूर होणार आहे. सावंतवाडी आगाराच्या सहकार्याबद्दल ग्रामस्थांनी समाधान व्यक्त केले. यावेळी आरोंदा सरपंच सायली साळगावकर, ग्रामपंचायत सदस्य सुभाष नाईक, स्मिताली नाईक, शिल्पा नाईक, सुभद्रा नाईक, तंटामुक्त अध्यक्ष मनोहर आरोंदेकर, भाजप बूथ अध्यक्ष सुरेंद्र कामत, एसटीचे चालक-वाहक व ग्रामस्थ मोठ्या संख्येने उपस्थित होते.
.......................
11976

क्रीडा महोत्सवामध्ये
भालावल शाळेचे यश

सकाळ वृत्तसेवा
आरोंदा, ता. २० ः सावंतवाडी तालुकास्तरीय बाल कला, क्रीडा महोत्सव २०२५-२६ मध्ये जिल्हा परिषद पूर्ण प्राथमिक शाळा भालावलच्या विद्यार्थ्यांनी उल्लेखनीय यश प्राप्त केले.
यात लहान गट मुलगे १०० मीटर धावणे व लांब उडी या क्रीडा प्रकारात शिवम परब याने द्वितीय, मोठा गट मुली लांब उडी या प्रकारात रिया चरण परब हिने प्रथम क्रमांक पटकावला. या दोघांची जिल्हास्तरीय क्रीडा स्पर्धेसाठी निवड झाली आहे. त्यांच्या यशाबद्दल बांदा प्रभाग विस्तार अधिकारी लक्ष्मीदास ठाकूर, तांबुळी केंद्रप्रमुख आर. बी. गावडे, मुख्याध्यापिका नम्रता कोठावळे, शिक्षक गोंडूजी ढवळी, निलेखा गवंडळकर, विठ्ठल कुंभार, रुपेशकुमार गुंजाळ यांनी विद्यार्थ्यांचे अभिनंदन केले. तसेच शाळेतील विद्यार्थ्यांच्या या यशाबद्दल सरपंच समीर परब, उपसरपंच अर्जुन परब, शाळा व्यवस्थापन समिती अध्यक्ष घारु परब, उपाध्यक्ष रमेश परब आदींनी विद्यार्थ्यांना पुढील वाटचालीस शुभेच्छा दिल्या.