चंदगडच्या जखमी व्यक्तीला सावंतवाडीत मदतीचा हात

चंदगडच्या जखमी व्यक्तीला
सावंतवाडीत मदतीचा हात

सकाळ वृत्तसेवा
सावंतवाडी, ता. २० ः येथील रेणुका हॉटेल नजीक पायाला जखमा होऊन उन्हामध्ये व्याकुळ अवस्थेमध्ये पडलेल्या चंदगड येथील एका व्यक्तीला मदतीचा हात देत सावंतवाडीकरांनी सामाजिक बांधिलकी जपली. जखमी अवस्थेतील त्या व्यक्तीची माहिती सामाजिक कार्यकर्ते चंदन नाईक यांनी सामाजिक बांधिलकी प्रतिष्ठानचे रवी जाधव यांना दिली.
श्री. जाधव, लक्ष्मण कदम व रुपा मुद्राळे यांनी पोलिसांची मदत घेऊन या व्यक्तीला स्वच्छ करून रुग्णालयात दाखल केले. त्याच्यावर प्राथमिक उपचार करून जेवण देऊन त्याला त्याच्या गावी चंदगड येथे पाठविण्याची व्यवस्था केली. तो व्यक्ती उच्चशिक्षित असून चांगल्या प्रकारे इंग्लिश बोलतो; परंतु त्याने आपल्या घरातील सर्व व्यक्तींचा मृत्यू झाल्याची माहिती दिल्याने त्याचे मानसिक संतुलन बिघडले असल्याचा अंदाज व्यक्त करण्यात आला. पोलिस प्रशासन व डॉक्टरांच्या सहकार्याबद्दल आभार व्यक्त करण्यात आले.