-देवरूखमध्ये राष्ट्रवादीतर्फे विजयी उमेदवारांचा सत्कार

राष्ट्रवादीतर्फे विजयी उमेदवारांचा सत्कार
सकाळ वृत्तसेवा
संगमेश्वर, ता. २३ ः नगरपंचायत निवडणुकीचा निकाल जाहीर झाल्यानंतर आमदार शेखर निकम यांनी देवरूख येथे दौरा करत विजयी उमेदवारांचे अभिनंदन केले. त्याचबरोबर पराभूत झालेल्या उमेदवारांचेही मनोबल वाढवतानाच पुढील काळात जोमाने काम करा आणि जनतेचा विश्वास संपादन करा, असे सांगितले. या वेळी राष्ट्रवादी काँग्रेसच्या विजयी उमेदवारांचा सत्कार करण्यात आला.
देवरूख नगरपंचायत निवडणुकीत महायुतीने स्पष्ट बहुमत मिळवत १७ पैकी १० जागांवर विजय संपादन केला. त्याबद्दल देवरूख येथे विजयी उमेदवारांचा सत्कार कार्यक्रम आयोजित करण्यात आला होता तसेच महायुतीच्या उमेदवार नगराध्यक्षा मृणाल शेट्ये (भाजप) यांची भेट घेऊन त्यांना शुभेच्छा देण्यात आल्या. यासोबतच अपक्ष तसेच उबाठा गटातील विजयी उमेदवारांचेही अभिनंदन केले तसेच राजकारण म्हणजे वैर नव्हे तर सेवा आहे, हा सकारात्मक आणि प्रेरणादायी संदेश दिला. आज देवरूखमध्ये राजकीय विजयापेक्षा नेतृत्वाच्या संस्कारांची चर्चा अधिक रंगताना दिसत आहे. या वेळी पूजा निकम (चिपळूण माजी पंचायत समिती सभापती), महायुतीचे विजयी उमेदवार, पदाधिकारी तसेच कार्यकर्ते मोठ्या संख्येने उपस्थित होते.