''अटल''तर्फे ११ जानेवारीला जिल्हास्तरीय संस्कृत स्पर्धा

‘अटल’तर्फे ११ जानेवारीला
जिल्हास्तरीय संस्कृत स्पर्धा
सकाळ वृत्तसेवा
सावंतवाडी, ता. २३ः सर्व भाषांची जननी म्हणून ज्या भाषेला जागतिक मान्यता मिळालेल्या संस्कृत भाषेचा प्रचार, प्रसार व संवर्धनासाठी अटल प्रतिष्ठानच्या वतीने विविध कार्यक्रम राबविले जातात. कुडाळ येथील उद्योजक व कुडाळ एमआयडीसी इंडस्ट्रीज असोसिएशनचे उपाध्यक्ष डॉ. नितिन पावसकर यांनी त्यांचे वडील (कै.) महादेव उर्फ नारायण भास्कर पावसकर यांच्या स्मरणार्थ जिल्हास्तरीय विविध स्पर्धांचे आयोजन केले आहे. विजेत्या स्पर्धकांना बांबूपासून बनविलेली स्मृतिचिन्हे व सहभागी सर्व स्पर्धकांना प्रशस्तीपत्रक देऊन गौरविण्यात येणार आहे. ही स्पर्धा तीन गटात होणार आहे. पहिल्या गटासाठी (पाचवी ते सहावी) गणपती स्त्रोत्र पाठांतर होणार आहे. यामध्ये अचूक पाठांतर व उच्चार शुद्धता याला प्राधान्य देण्यात येईल. दुसऱ्या गटासाठी (सातवी ते आठवी) संस्कृत गीत गायन असून यामध्ये गेयता व उच्चार शुद्धता विचारात घेतली जाईल. तिसऱ्या गटाकरिता (नववी ते दहावी) संस्कृत कथाकथन स्पर्धेचे आयोजन केले आहे. यामध्ये पाठांतर, मांडणी व कथेची निवड हे निकष विचारात घेतले जातील. ही स्पर्धा ११ जानेवारीला येथील श्री पंचम खेमराज महाविद्यालयात सकाळी ९.३० ते १२.३० या वेळेत होणार आहे. प्रत्येक शाळेने स्पर्धेसाठी तीन विद्यार्थी पाठवावे. नावनोंदणी ५ जानेवारीपर्यंत ज्योती राऊळ द्वारा, अटल प्रतिष्ठान कार्यालय माठेवाडा-सावंतवाडी येथे करावी, असे आवाहन अटल प्रतिष्ठानच्या वतीने संस्थापक अध्यक्ष ॲड. नकुल पार्सेकर, कार्यवाह डॉ. राजशेखर कार्लेकर यांनी केले आहे.