सातार्डा पुलाची ३० डिसेंबरपर्यंत दुरुस्ती करा; अन्यथा आंदोलन

सातार्डा पुलाची ३० डिसेंबरपर्यंत
दुरुस्ती करा; अन्यथा आंदोलन

कळंगुटकर यांचा प्रशासनाला इशारा

सकाळ वृत्तसेवा
​सावंतवाडी, ता. २३ ः महाराष्ट्र आणि गोवा राज्यांना जोडणारा सातार्डा येथील पूल सध्या अत्यंत धोकादायक स्थितीत असून प्रशासनाच्या हलगर्जीपणामुळे हा पूल मृत्यूचा सापळा बनला आहे. या पुलावरून रोज विद्यार्थी, शासकीय कर्मचारी आणि सिंधुदुर्ग जिल्ह्यातून गोव्यामध्ये कामानिमित्त जाणारे शेकडो युवक-युवती जीव मुठीत धरून प्रवास करत आहेत. ३० डिसेंबरपूर्वी पुलाची दुरुस्ती न झाल्यास सर्व ग्रामस्थांसह पुलावरील खड्ड्यात बसून आंदोलन करू, असा इशारा सामाजिक कार्यकर्ते नितीन कळंगुटकर यांनी प्रशासनाला दिला आहे.
याबाबत त्यांनी दिलेल्या प्रसिद्धी पत्रकात म्हटले आहे, की ‘पुलावर पडलेले महाकाय खड्डे आणि पुलाच्या मुख्य खांबांना गेलेले तडे यामुळे हा पूल कोणत्याही क्षणी कोसळण्याची भीती आहे. या गंभीर परिस्थितीकडे स्थानिक प्रशासनाचे वारंवार लक्ष वेधूनही अद्याप कोणतीही दखल घेतली जात नसल्याने कळंगुटकर यांनी आक्रमक पवित्रा घेतला आहे. सध्या या पुलाची अवस्था पाहता वाहनधारकांसह शाळकरी मुलांच्या जीवाला धोका आहे. एखादी मोठी दुर्घटना घडण्याची प्रशासन वाट पाहत आहे का? असा संतप्त प्रश्‍न नागरिकांकडून विचारला जात आहे. पुलावरील खड्डे बुजवून तो तातडीने सुस्थितीत करावा. पुलाचे तातडीने स्ट्रक्चरल ऑडिट करून तिथे आवश्यक त्या संरक्षणात्मक उपाययोजना कराव्यात. याबाबत ३० डिसेंबरपर्यंत ठोस पावले उचलली नाहीत, तर लोकशाही मार्गाने आंदोलन छेडू.’