रत्नागिरी प्रधान डाकघर येथे निर्यात केंद्र सुरू

उद्योजकांसाठी डाकघर निर्यात केंद्र
अधीक्षक सरंगले ः परदेशात पत्रे, पार्सल सेवा
सकाळ वृत्तसेवा
रत्नागिरी, ता. २३ : भारतीय डाक विभागातर्फे परदेशात पत्रे आणि पार्सल अल्पदरात पाठवण्याची सुविधा उपलब्ध करून दिली आहे तसेच छोट्या उद्योजकांना निर्यातीसाठी मार्गदर्शन पोस्ट कार्यालयामार्फत मिळू शकते. यासाठी रत्नागिरी प्रधान डाकघर येथे डाकघर निर्यात केंद्र सुरू झाले असून, छोट्या उद्योजकांनी याचा फायदा घ्यावा, असे आवाहन डाकघर अधीक्षक अ. द. सरंगले यांनी केले आहे.
भारतीय डाक विभाग म्हणजेच पोस्ट ऑफिसमार्फत ख्रिसमस व नवीन वर्षाच्या शुभेच्छासुद्धा आपण पाठवता येतील. यापूर्वी पोस्ट कार्यालयामार्फत यावर्षी दिवाळीमध्ये परदेशातील आप्त स्वकीयांचे व मुलांचे तोंड फराळाने गोड केले. रत्नागिरी जिल्ह्यातून दिवाळीमध्ये ४० पार्सल विविध १२ देशांत पाठवण्यात आली. खासगी कुरिअरचा विचार करता पोस्ट ऑफिसचे दर अगदी वाजवी असून, सामान्य माणसाच्या खिशाला परवडणारे आहेत. शैक्षणिक कालावधीमध्ये पालक काटकसर करून मुलांचे शिक्षण पूर्ण करत असतात. अशा परदेशी शिक्षणाचा खूपच खर्च असतो. एवढे असूनही मुलांना घराचा, प्रेमाचा खाऊ मिळावा, ही पालकांची इच्छा असते; परंतु खूप मोठे दर पाहता इच्छा असूनही पालक ते करू शकत नाहीत; परंतु डाक विभागाने ही सेवा नवीन स्वरूपात सुरू केली आहे. कमीत कमी खर्चात आपण आपली भेटवस्तू आणि अन्य घरगुती उपयोगाचे साहित्य परदेशी पाठवू शकतात, असे सरंगले यांनी सांगितले.