शासकीय वैद्यकीय महाविद्यालयात पित्ताशय गॅग्रीनची यशस्वी शस्त्रक्रिया

पित्ताशय गॅग्रीनची शस्त्रक्रिया
शासकीय रुग्णालयात यशस्वी

सकाळ वृत्तसेवा
सिंधुदुर्गनगरी, ता. २३ ः शासकीय वैद्यकीय महाविद्यालय व रुग्णालय, सिंधुदुर्ग येथे पित्ताशयाच्या गॅग्रीनची शस्त्रक्रिया यशस्वी पार पडल्याची माहिती शासकीय वैद्यकीय महाविद्यालय व रुग्णालयाचे अधिष्ठाता डॉ. अनंत डवंगे यांनी दिली आहे.
मालवण तालुक्यातील ६४ वर्षीय महिलेला अचानक पोटदुखीचा त्रास झाल्यामुळे शासकीय वैद्यकीय महाविद्यालय व रुग्णालय, सिंधुदुर्ग येथे ३ डिसेंबरला सर्जरी विभागात दाखल केले होते. या महिलेच्या पोटाच्या उजव्या व वरच्या बाजूला प्रचंड वेदना होऊन उलट्या होत होत्या. पित्ताशयामध्ये खडे असल्याने तसेच पित्ताशय पोटात फुटल्याचे निदान झाले. सर्जरी विभागाचे विभाग प्रमुख तथा प्रभारी अधिष्ठाता डॉ. डवंगे यांनी तत्काळ शस्त्रक्रियेचा निर्णय घेतला. शस्त्रक्रियेदरम्यान पित्ताशयाच्या काही भागाचा गँग्रीन झाला असल्याचे निष्पन्न झाले. शर्थीचे प्रयत्न करून या रुग्णाचे पित्ताशय काढण्यात आले. डॉ. डवंगे यांच्यासह डॉ. निखिल जाधव, डॉ. मोनालिसा वजराटकर, इंटर्न सिजिथ राजेंद्रन यांनी ही शस्त्रक्रिया यशस्वीरित्या पार पाडली. बधिरीकरणशास्त्र विभागाच्या प्रमुख डॉ. सरिता ठाणेकर व त्यांच्या चमूतील डॉ. आकांक्षा उपासे, डॉ. यश कनबर, डॉ. धनश्री केने यांनी यशस्वीरित्या रुग्णाला अॅनेस्थेशिया दिला. शस्त्रक्रियेमध्ये स्टाफ नर्स करिष्मा कवडेकर, रुपक कुडाळकर यांचे सहकार्य लाभले. रुग्ण पूर्ण बरा झाल्यानंतर १८ डिसेंबरला घरी पाठवले.