क्राईम

तीन हजारांची
गोठीवरेत घरफोडी
राजापूर ः गोठीवरे-बुरंबे (ता. राजापूर) येथील घराचा कडीकोयंडा उचकटून चोरट्याने स्वयंपाक बनवण्याचे तीन हजाराचे साहित्य पळवले. नाटे सागरी सुरक्षा पोलिस ठाण्यात गुन्हा दाखल करण्यात आला आहे. ही घटना ९ ते २१ डिसेंबरदरम्यान सकाळी दहाच्या सुमारास निदर्शनास आली. पोलिसांकडून मिळालेल्या माहितीनुसार, फिर्यादी रसिका रवींद्र रासम (वय ५७, रा. डोंबिवली पूर्व, मूळ रा. गोठिवरे, राजापूर) यांच्या बंद घराचा मुख्य दरवाजाचा कडीकोयंडा चोरट्याने उचकटला. घरातील एक हजाराचे झाडे कापण्याचे मशिन ब्लेड, दुसरे एक हजाराचे झाडे कापण्याचे मशिन तसेच १ हजार किमतीचे जेवण बनवण्याचे साहित्य पळवले. या प्रकरणी रसिका रासम यांनी नाटे पोलिस ठाण्यात तक्रार दिली.

सार्वजनिक ठिकाणी
दारू पिणाऱ्यांवर गुन्हा
रत्नागिरी ः तालुक्यातील मालगुंड ते निवेंडी जाणाऱ्या रस्त्यावरील पऱ्याच्या किनारी दारू पिणाऱ्या प्रौढांविरुद्ध जयगड पोलिस ठाण्यात गुन्हा दाखल करण्यात आला आहे. शरद अशोक मयेकर असे संशयिताचे नाव आहे. ही घटना सोमवारी (ता. २२) दुपारी निवेंडी जाणाऱ्या रस्त्यावरील पऱ्याच्या किनारी निदर्शनास आली. या प्रकरणी पोलिस कॉन्स्टेबल नीलेश गुरव यांनी जयगड पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे. दरम्यान, आझाद मैदान येथील शासकीय गोदामाच्या पाठीमागील मोकळ्या जागेत मद्यपान करणाऱ्या तरुणाविरुद्ध दापोली पोलिस ठाण्यात गुन्हा दाखल करण्यात आला आहे. अनिल सातेरी मिलगे असे संशयिताचे नाव आहे. ही घटना सोमवारी (ता. २२) रात्री आठच्या सुमारास निदर्शनास आली. या प्रकरणी पोलिस कॉन्स्टेबल ज्ञानेश्वर मडके यांनी दापोली पोलिस ठाण्यात तक्रार दिली.