वेत्ये येथील खनिज उत्खनन विरोधात सावंतवाडीत ठिय्या

12949

वेत्ये येथील खनिज उत्खनन
विरोधात सावंतवाडीत ठिय्या

परवानगी चुकीची असल्याचा आरोप

सावंतवाडी, ता. २३ ः वेत्ये (ता.सावंतवाडी) येथे गौण खनिज उत्खनन प्रकरणी प्रशासनाकडून चुकीच्या पद्धतीने येथील तहसीलदारांनी परवानगी दिल्याचा आरोप करत माहिती अधिकार कार्यकर्ते महेश सावंत यांनी उपोषण सुरू केले आहे.
संबंधित जमिनीवर २०२१-२२ दरम्यान झालेल्या बेकायदेशीर उत्खननापोटी ४३ लाख ६९० रुपयांचा दंड आकारला होता. त्याच्या वसुलीसंदर्भात सध्या उपविभागीय अधिकारी (महसूल) यांच्याकडे अपील प्रलंबित आहे. याबाबत माहिती असतानाही तहसीलदारांनी त्याच जमिनीवर पुन्हा उत्खननाची परवानगी दिली आहे. यामुळे शासनाचे आर्थिक नुकसान होत असून दोषींना पाठीशी घातले जात असल्याचे सावंत यांनी म्हटले आहे. त्यांनी उत्खनन परवानगी तात्काळ रद्द करावी, प्रलंबित असलेल्या ४३ लाखांच्या दंडाची वसुली पूर्ण होईपर्यंत सातबारा उताऱ्यावर बोजा चढवावा आणि जागेवर मोजमाप घेऊन वाढीव उत्खननाचा दंड वसूल करावा, शासनाची फसवणूक करणाऱ्या व्यक्तीवर फौजदारी गुन्हा दाखल करण्याची मागणीही केली आहे. यासाठी त्यांनी उपोषण पुकारले असून, जोपर्यंत ठोस कारवाई होत नाही तोपर्यंत मागे न हटण्याचा पवित्रा घेतला आहे.